Salyq reformasynyń ınflıatsııaǵa áseri: Tabysy tómen jandardyń ómiri qıyndaı ma – mınıstr jaýaby

ASTANA. KAZINFORM – QR Premer-mınıstriniń orynbasary – Ulttyq ekonomıka mınıstri Serik Jumanǵarın jańa Salyq kodeksi qabyldanǵan soń ınflıatsııa kúsheıse, memleket áleýmettik osal toptaǵy azamattarǵa qalaı kómek kórsetetinin aıtyp berdi.

«Atameken» QR Ulttyq kásipkerler palatasynda ótken baspasóz máslıhatynda BAQ ókilderi qurylys salýshylarǵa QQS engizilgen soń turǵyn úı baǵasy sharyqtap, áleýmettik osal toptaǵy azamattardyń ómir súrýi qıyndap ketpeı me dep surady. 

— Biz bul salany zerttedik. 2001 jyly qurylysshylarǵa kóptegen jeńildikter berdik. Biraq sodan beri turǵyn úı sharshy metriniń baǵasy júzdegen paıyzǵa ósti. Baǵanyń ósýinen jeńildikter qutqarmaıtynyna kózimiz jetti. Ondaı bolsa, biz olarǵa jeńildikterdi ne úshin bergen bolamyz? Onsyz da baǵa ósedi eken, eń bolmasa salyq salyp, bul saladan paıda kóreıik. Túsken qarjyny áleýmettik osal toptarǵa jumsaıyq, - dedi ol. 

Sondaı-aq mınıstr qajet bolǵan jaǵdaıda tabysy tómen jandarǵa memlekettik qoldaý da artatynyn aıtty. 

— Áleýmettik osal toptarǵa jáne tabysy bıýdjetke baılanysty barlyq adamdarǵa keletin bolsaq, ınflıatsııa artsa ındeksteý sharalary qarastyrylǵan. Biz ol somany ataǵanbyz, ol kemi 800 mlrd teńge shamasynda bolady. Biz joǵaryda aıtqan toptaǵy adamdardy qoldaý úshin bul somany bólýge daıynbyz. Qajet bolǵan jaǵdaıda ataýly áleýmettik kómek mólsherin ulǵaıtamyz. Baǵa kóterilse, turǵyn úı qoryn molaıtamyz. Bul reforma sondaı múmkindik berip otyr. Sondyqtan olarǵa bul ózgeris aýyrtpalyq salmaıdy, - dedi Serik Jumanǵarın. 

Aıta keteıik, búgin Memleket basshysy jańa Salyq kodeksine qol qoıdy.