Salyq reformasy: Túrkistan oblysy kásipkerleri Úkimetke usynystaryn jetkizdi

ASTANA. KAZINFORM – QR ulttyq ekonomıka vıtse-mınıstri Baýyrjan Qudaıbergenov bıznes ókilderimen, Túrkistan oblysy Kásipkerler palatasynyń salalyq jáne aýdandyq keńes múshelerimen kezdesip, jańa salyq reformasyn talqylady.

Kezdesý barysynda qatysýshylar jańa Salyq kodeksindegi ózgerister jaıyn aıtyp, onyń bızneske yqpalyn saralady. 

«BNK Group LTD» JShS bas dırektory Nııazaly Beısenbaev Qazaqstanda qosylǵan qun salyǵynyń 20%-ǵa kóterilýiniń agroónerkásip keshen óndirýshilerine yqtımal áserine toqtaldy. 

– Mólsherlemeniń ósýi shaǵyn jáne orta bızneske qosymsha salmaq túsiredi. Sondyqtan Úkimetke keıbir basym salalar úshin dıfferentsıaldy salyq mólsherlemesin engizý, tabysy tómen kásiporyndarǵa ýaqytsha salyqtyq demalys berý jáne kóleńkeli ekonomıkamen kúresý sharalaryn kúsheıtý máselesin qarastyrýdy usynamyz. Bul kásipkerler men tutynýshylarǵa keletin teris áserdi azaıtýǵa múmkindik beredi, - dedi ol. 

Óz kezeginde, ulttyq ekonomıka vıtse-mınıstri Baýyrjan Qudaıbergenov qazirgi ýaqytta agrarlyq sektorda sharýa qojalyqtary QQS tólemeıtinin, al zańdy tulǵalar qoldanystaǵy jeńildikterdiń arqasynda bıýdjetke tólenýge tıisti salyqtardyń tek 30%-yn ǵana tóleıtinin atap ótti.

Kezdesý barysynda bıznes ókilderi salyqtyq júktemeniń artýyna baılanysty alańdaýshylyqtaryn bildirip, óz usynystaryn jetkizdi. Al Ulttyq ekonomıka mınıstrligi ókilderi barlyq pikir men usynystardyń nazarǵa alynatynyn málimdedi.