Salyq reformasy – bıýdjet saıasatyn túbegeıli ózgertýge arnalǵan tereń reforma – Jumanǵarın

ASTANA. KAZINFORM – Premer-Mınıstrdiń orynbasary – Ulttyq ekonomıka mınıstri Serik Jumanǵarın Kazinform agenttigine eksklıýzıvti suhbat berdi. BIZDIÑ ORTA podkasty meımanyna alǵashqy suraq qosylǵan qun salyǵyna qatysty qoıyldy. 

— Salyq reformasy — bıýdjet saıasatyn túbegeıli ózgertýge arnalǵan tereń reforma. Elimizdiń búkil kirisi men shyǵysy fılosofııasyn ózgertetin reforma. Úkimet pen salyq tóleýshilerdiń arasyndaǵy jańa áleýmettik shart. Salyqtardyń sanyn, kólemin qysqartyp, bızneske júktemeni azaıtý — ekonomıkalyq zań, biraq ákimshilik jumysty nyǵaıtý kerek. Qosylǵan qun salyǵyn 20%-dan 12%-ǵa deıin tómendettik, korporatıvtik tabys salyǵy 30%-dan 20%-ǵa deıin tómendedi. Qosymsha shaǵyn jáne orta bızneske biraz jeńildikter berildi, salyq komıtetiniń quzyreti azaıtyldy, - dedi Serik Jumanǵarın suhbat barysynda.

Osylaısha Ulttyq ekonomıka mınıstri 454 qosymsha salyqtyń 128-i alynyp tastalatynyn aıtyp otyr. 

— Bıznes paıdaly, biraq ony júrgizý ońaı emes. Qazir bizde qosylǵan qun salyǵy jalpy ishki ónim kóleminde 14% ǵana, al damyǵan elderde 20%-dan asady. 14% bıznestiń óz-ózine salǵan ınvestıtsııasy. Basqa salyqtar boıynsha da solaı, jınalym da, paıdasy da tómen. Sol sebepti ózgertý kerek. Qosylǵan qun salyǵy men korporatıvtik tabys salyǵy boıynsha shaǵyn jáne orta bıznestiń úlesi tómen, negizinen iri bızneske tıesili, - deıdi vedomstvo basshysy.

Premer-Mınıstr orynbasarynyń málimetinshe, búginde elimizde 2 myńnan astam iri bıznes sýbektisi bar. Olardyń salyq pen jalpy ishki ónimdegi úlesi — 66%, al shaǵyn jáne orta bıznestiń úlesi — 14%.

— Árıne, iri bızneske taǵy bir qosymsha salyq salýǵa bolatyn edi, biraq iri bıznes — bizdiń dińgegimiz. Іri bıznesti joǵaltsaq, basqa memleketterge ketirip alsaq, salyq kirisinsiz qalamyz. Sondyqtan biz qazirgi qısyq júıeni ózgertýimiz kerek, - dep tolyqtyrdy S. Jumanǵarın.

Aıta keteıik, 9 sáýirde Májilis Salyq kodeksiniń jańa jobasyn birinshi oqylymda maquldady. 

Salyq kodeksiniń jańa jobasy boıynsha salyq esebin tapsyratyndar sany 30 paıyzǵa qysqarady. 

Eske salsaq, qosylǵan qun salyǵy salynatyn aınalymnyń tómengi shegi 40 mln teńge bolady. 

Sondaı-aq Serik Jumanǵarın korporatıvtik tabys salyǵynyń mólsherlemesi ósetin salalardy atady.