Salyq organdary jasyryn páter jaldaýshylardy anyqtaý úshin ýchaskelik polıtsııany tartady

ASTANA. KAZINFORM — Qarjy mınıstriniń orynbasary Erjan Birjanov páter jaldaýdan túsken tabysynyń salyǵyn tóleýden jaltaryp júrgen qazaqstandyqtardy qandaı tásilmen anyqtaıtyndaryn aıtty. 

Onyń sózinshe mundaı adamdardy kameraldyq baqylaý arqyly anyqtaýǵa bolady.

— Shartty túrde, jeke tulǵanyń 10 páteri boldy deıik. Onyń bireýinde ózi tursa, qalǵanyn jalǵan berýi múmkin ǵoı. Biz múlik ıeleri birlestikterimen, ýchaskelik polıtseılermen tyǵyz jumys isteý arqyly osy máseleni nazarda ustap otyramyz. Jańaǵy 10 páterdiń ıesi aı saıyn bank qosymshalary jáne basqa da kózder arqyly aqsha alatynyn kórip otyramyz. Ondaı aýdarymdar bolsa, páter ıesine qoıatyn suraq týyndaıdy, — dedi Erjan Birjanov Májilis kýlýarynda.

Vıtse-mınıstr mundaı páter ıelerin óz erkimen ashyq jumysqa kóshýge yntalandyratyn sharalar qabyldanyp jatqanyn aıtady.

— Ol úshin túrli ońaılatylǵan salyq rejımderi jasalyp jatyr. Salyq tóleýshiler qazir resmı tirkelmeı-aq, jylyna bir ret deklaratsııa tapsyrý arqyly da jumys isteı alady, — dedi ol.

Buǵan deıin jańa oqý jyly qarsańynda páter jaldaý baǵasy qalaı ózgergenin jazǵan edik.