Salyq organdary jasandy ıntellektini qoldanatyn bolady

ASTANA. KAZINFORM — Jyl sońyna deıin salyqtyq bereshekti ákimshilendirýge qatysty qosymsha ózgerister men jańa bastamalar kútiledi. Bul týraly Qarjy mınıstrligi Memlekettik kirister komıteti Aýdıt departamentiniń bereshekpen jumys basqarmasynyń basshysy Aryn Qaısar tikeleı efır barysynda málimdedi.

Spıkerdiń aıtýynsha, qazirgi ýaqytta salyq organdary jasandy ıntellekt negizinde pılottyq jobany iske qosyp jatyr. Bul jańashyldyq salyq tóleýshilerdiń múlkin túgendeý jáne baǵalaý rásimin aıtarlyqtaı jeńildetýge múmkindik beredi.

— Qazirgi ýaqytta aýmaqtyq organdardaǵy áriptesterimiz múlikke túgendeý aktisin toltyrý kezinde birqatar qıyndyqqa tap bolady. Onyń ishinde — múliktiń balanstyq qunyn dál sol sátte anyqtaı almaý. Bul protsess ádette bir aıdan astam ýaqytty alady. Sebebi biz «Problemalyq kredıtter qory» arqyly táýelsiz baǵalaýshylardy tartamyz. Odan keıin esep komıssııa arqyly beriledi. Bul uzaq ári kúrdeli tizbek, — dedi Aryn Qaısar.

Jańa joba bul protsesti túbegeıli ózgertýge baǵyttalǵan.

— Jańa júıe boıynsha salyq ınspektorynda arnaıy mobıldi qosymsha bolady. Sol qosymshanyń kómegimen ınspektor múlikti fotoǵa túsiredi, al jasandy ıntellekt negizinde baǵdarlama avtomatty túrde baǵalaý esebin daıyndaıdy. Bul bar bolǵany 20 mınýttan 3 saǵatqa deıin ýaqyt alady. Biz bul pılottyq jobany synaqtan ótkizdik, nátıjesinde bir aılyq jumysty birneshe saǵatta oryndaýǵa bolatyny dáleldendi, — dep túsindirdi spıker.

Qazirgi ýaqytta joba Qarjy mınıstrliginde qaralyp jatyr. Eger qoldaý tapsa, Ádilet mınıstrliginen tirkeýden ótkizip, tájirıbege resmı túrde engizilmek. 

Buǵan deıin Qazaqstanda jasandy ıntellekt jáne tsıfrlyq damý mınıstrligi qurylatynyn jazǵanbyz.

Eske sala keteıik, bıylǵy Prezıdent Joldaýynyń biriktirýshi ıdeıasy — tsıfrlandyrýdy keń kólemde damytý jáne jasandy ıntellektini jappaı engizý.