Salyq organdary zańsyz QQS shemalaryna qarsy baqylaýdy kúsheıtti
ASTANA. KAZINFORM - Memlekettik kirister organdary salyq tóleýden jaltarý shemalaryn anyqtaý jáne olardyń jolyn kesý boıynsha turaqty negizde jumys júrgizip jatyr. Osyndaı shemalardyń biri – negizsiz salyqtyq artyqshylyq alý maqsatynda kásiporyndardy qaıta uıymdastyrý rásimin paıdalaný.
QR Qarjy mınıstrligi Memlekettik kirister komıteti baspasóz qyzmetiniń habarlaýynsha, ádettegi tájirıbede bıznesti qaıta uıymdastyrý qyzmetti keńeıtý, bıznes-protsesterdi ońtaılandyrý, mekemelerdiń birigýi nemese qosylýy maqsatynda júzege asyrylady. Sonymen qatar, sońǵy jyldary bul rásimdi salyq mindettemelerin oryndaýdan jaltarý, onyń ishinde qosylǵan qun salyǵy (QQS) boıynsha jaltarý maqsatynda paıdalaný jaǵdaılary jıilep otyr.
Jalpy, memlekettik kirister organdary 2021-2024 jyldar aralyǵynda jalpy somasy 31,7 mlrd teńgeni quraıtyn QQS asyp ketý somasyn qaıta uıymdastyrý kezinde paıdalanǵan 263 zańdy tulǵany anyqtady. Salyq kodeksiniń normalaryna sáıkes atalǵan somalar esepten shyǵaryldy, nátıjesinde bıýdjetke 3 mlrd teńge tústi, sondaı-aq QQS asyp ketý somasy 20 mlrd teńgege azaıtyldy.
Memlekettik kirister organdarynyń áreketteriniń zańdylyǵy sot tájirıbesimen rastaldy. Búgingi kúni kassatsııalyq sottarda 10-nan astam is qaralyp, barlyq sheshimder memlekettik kirister organdarynyń paıdasyna shyǵaryldy.
Osyndaı shemalardyń jolyn kesý maqsatynda Salyq kodeksine ózgerister engizildi. 2026 jylǵy 1 qańtardan bastap qaıta uıymdastyrý rásimi kelesilerdi kózdeıtin salyqtyq ákimshilendirý júrgizilgennen keıin ǵana júzege asyrylady:
- salyq mindettemesin oryndaýdyń ońaılatylǵan tártibin qoldaný kezinde kameraldyq baqylaý júrgizý;
- qalǵan jaǵdaılarda salyqtyq tekserý júrgizý.
Kameraldyq baqylaý júrgizile otyryp, ońaılatylǵan tártipti qoldanýǵa birqatar sharttar saqtalǵan kezde jol beriledi, onyń ishinde talap qoıý merzimi ishinde QQS tóleýshi retinde tirkelmeýi, aınalym kóleminiń az bolýy, salyq beresheginiń jáne ózge de táýekel faktorlarynyń bolmaýy.
Atalǵan normalar 2025 jylǵy 31 qazandaǵy № 654 «Salyq tóleýshilerdiń qyzmetin taratý, qaıta uıymdastyrý jáne toqtatý kezinde salyqtyq mindettemeni oryndaýdyń keıbir máseleleri týraly» buıryǵymen bekitilgen qaıta uıymdastyrý kezinde salyq mindettemesin oryndaý qaǵıdalarynda kózdelgen.
Sonymen qatar, 300 aılyq eseptik kórsetkishten asatyn QQS asyp ketý somasy keshendi salyqtyq tekserý nátıjeleri boıynsha mundaı somalardyń durystyǵy rastalǵan jaǵdaıda ǵana quqyq mırasqoryna berilýi múmkin.
Memlekettik kirister komıteti salyq tóleýshilerdi adal salyq salý qaǵıdattaryn saqtaýǵa shaqyrady jáne salyq zańnamasynyń talaptaryn buzǵany úshin jaýapkershilik bar ekenin eske salady.
Budan buryn Memlekettik kirister komıtetiniń ózin-ózi jumyspen qamtyǵan 500 myń adamdy «kóleńkeden» shyǵaratyny týraly jazdyq.
