Salyq organdary mobıldi aýdarymdardy teksere bastady – Erjan Birjanov

ASTANA. KAZINFORM – Qazaqstanda bankterden alynǵan mobıldi aýdarymdar týraly derekterdi salyq organdary óńdep jatyr. 

Májilis kýlýarynda Qarjy vıtse-mınıstri Erjan Birjanov alǵashqy salyqtyq habarlamalar azamattarǵa mamyr aıynda jiberile bastaıtynyn aıtty. Sonymen qatar ol bankterden 15 sáýirge deıin túsken málimetter qazirgi ýaqytta taldaý kezeńinde ekenin atap ótti.

– Ázirge naqty qansha azamattyń aýdarymdary baqylaýǵa alynǵanyn aıtý múmkin emes. Sebebi bir adamnyń derekteri birneshe bankten kelýi múmkin. Sol sebepti aqparatty tolyq taldap, sanattarǵa bólip shyǵý qajet, - dedi ol.

Vıtse-mınıstrdiń málimetinshe, derekter aldymen azamattardyń mártebesine qaraı jikteledi. Atap aıtqanda, jeke kásipker, ózin-ózi jumyspen qamtyǵan tulǵa, beırezıdent nemese ózge sanattaǵy salyq tóleýshi.

– Qorytyndy jasaýǵa áli erte. Mamyr aıynda ǵana alǵashqy habarlamalar jiberile bastaıdy. Sol kezde naqty taldaý nátıjesin kóremiz, - dedi ol.

Buǵan deıin Qarjy vıtse-mınıstri Erjan Birjanov Qazaqstanda mobıldi aýdarymdardy tekserý normasyna qatysty túsinik bergen edi.