Salyq kodeksine usynylyp otyrǵan túzetýlerdi muqııat talqylaımyz – Májilis tóraǵasy
ASTANA. KAZINFORM — Salyq salasyndaǵy jaǵdaıdy jaqsartýǵa baǵyttalǵan salmaqty sheshim qabyldaýymyz qajet. Bul týraly Májilis tóraǵasy Erlan Qoshanov málim etti.
Búgin Májilistiń jalpy otyrysynda E. Qoshanov Úkimettiń keńeıtilgen otyrysynda Memleket basshysy salyq reformasy jóninde óz ustanymyn aıtqanyn eske saldy.
- Reforma qajet-aq, biraq ol barynsha saralanyp, baıyppen qaralýǵa tıis. Biz qosylǵan qun salyǵy men áleýmettik salyq boıynsha Úkimettiń pozıtsııasyn bildik. Bul másele boıynsha sarapshylar men Parlament depýtattary da óz pikirlerin aıtýda. Sondyqtan memlekettik organdarmen, bıznespen birlesip, Salyq kodeksine usynylyp otyrǵan túzetýlerdi muqııat talqylaıtyn bolamyz. Ózgeristerdi barlyq qyrynan jan-jaqty qarastyryp, salyq salasyndaǵy jaǵdaıdy jaqsartýǵa baǵyttalǵan salmaqty sheshim qabyldaýymyz qajet, - dedi E. Qoshanov.
Onyń aıtýynsha, basty máseleniń biri – mindetti medıtsınalyq saqtandyrý júıesi. Osy saladaǵy problemalar birneshe jyldan beri kóterilip kele jatqany málim.
- Kúni keshe Májiliste ótken Úkimet saǵatynda bul taqyryp jan-jaqty talqylandy. Depýtattar salalyq mınıstrlikke osy salada únemi oryn alyp kele jatqan birqatar problemany atap aıtty. Buǵan deıin Qoǵamdyq palata alańynda da keńinen talqylaý ótken bolatyn.
Endi osy pikirtalastardyń barlyq nátıjesin, sondaı-aq jınaqtalǵan tájirıbeni zańnamalyq turǵydan qaraý qajet. Biz medıtsınalyq saqtandyrý júıesindegi jaǵdaıdy shyn máninde jaqsartatyn, medıtsınalyq qyzmetter tutynýshylardyń bárin qanaǵattandyratyn túzetýler qabyldaýymyz kerek, - dedi E. Qoshanov.
Eske salsaq, 28 qańtarda Prezıdent Qasym-Jomart Toqaevtyń qatysýymen Úkimettiń keńeıtilgen otyrysy ótti.