Salyq kodeksin engizý jónindegi jobalyq keńse apta saıyn bıznes máselesin qaraıdy
ASTANA. KAZINFORM - Úkimette Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen jańa Salyq kodeksin engizý jónindegi jobalyq keńseniń jumysyn uıymdastyrý jónindegi birinshi keńes ótti.
Úkimettiń baspasóz qyzmeti habarlaǵandaı, jobalyq keńse Salyq kodeksiniń jáne kásipkerlikti retteýshiniń jańa normalaryn qoldanýǵa baılanysty bıznes ótinishterin júıeleý jáne jedel qaraý úshin biryńǵaı úılestirý ortalyǵy retinde qurylady. Onyń mindeti – memlekettik organdardyń kelisilgen is-qımylyn qamtamasyz etý jáne kásipkerlik qoǵamdastyqpen turaqty keri baılanys ornatý.
Jobalyq keńseniń birinshi otyrysyna «Atameken» UKP basshylyǵy, kásipkerlerdiń quqyqtaryn qorǵaý jónindegi ýákil Qanat Nurov, ortalyq memlekettik organdardyń ókilderi qatysty.
Jobalyq keńse jumysynyń negizgi logıkasy – «bir tereze» prıntsıpi. Salyq organdarynyń call-ortalyǵy, SalykBot Telegram-arnasy, Memlekettik kirister komıtetiniń bólimsheleri, «Atameken» UKP, áleýmettik jeliler men basqa da kommýnıkatsııa arnalary arqyly túsetin bıznestiń barlyq ótinishi bir ortalyqta jınaqtalady. Ótinishterge jaýap berýdiń naqty merzimderi belgilenedi. Kúrdeli jáne vedomstvoaralyq sıpattaǵy máseleler salalyq memlekettik organdardyń qatysýymen jobalyq keńseniń otyrystaryna shyǵarylady.
Jobalyq keńseniń otyrysyn apta saıyn ótkizý josparlanýda. Olar bıznestiń eń ózekti jáne jıi kóteretin máselelerin qarastyryp, sheshimder ázirlenedi, túsiniktemeler beriledi. Jobalyq keńse jumysynyń qorytyndysy memlekettik organdar men buqaralyq aqparat quraldarynyń kommýnıkatsııa arnalary arqyly jalpy jurtshylyqqa únemi jetkiziledi.
Qarjy vıtse-mınıstri Erjan Birjanovtyń aıtýynsha, 1-20 qańtar aralyǵynda salyq júıesinde 22 myń jańa salyq tóleýshi tirkelgen. Onyń 20 myńnan astamy jeke kásipker, 2 myńǵa jýyǵy zańdy tulǵa. Jańa QQS tóleýshilerdiń sany – 7100.
– Ózin-ózi jumyspen qamtýshylar rejımin 137 708 salyq tóleýshi tańdady. Onyń 100 myńnan astamy buryn salyqtyq ákimshilendirý salasynda bolmaǵan jeke tulǵa. Jańa rejım JK tirkeýsiz jáne kassalyq apparatty qoldanbaı, salyq tólemeı, tabystyń 4% mólsherinde áleýmettik tólemder boıynsha ǵana mindettememen jumys isteýge múmkindik beredi, — dep atap ótti Erjan Birjanov.
Implementatsııa kezeńi obektıvti qıyndyqtarmen birge júretini atap ótildi. Qańtardyń basynda salyqtyq ákimshilendirýdiń ıntegratsııalanǵan júıesin (SÁIJ) iske qosý kezinde tehnıkalyq máseleler tirkeldi. Búgingi tańda barlyq ádistemelik jáne tehnıkalyq máseleler retteldi. SÁIJ eldegi eń iri aqparattyq júıe bolyp sanalady. Ol bir ýaqytta 250 myń salyq tóleýshige qyzmet kórsetedi.
Búgingi tańda bıznestiń negizgi ótinishteri qoldanbaly sıpatqa ıe jáne salyq salý rejımin tańdaýǵa, habarlamalar berýge, derekterdi óńdeýdiń durystyǵyna, EQJJ tańdaýǵa, elektrondyq shot-faktýralardy toltyrýǵa jáne basqa da rásimdik máselelerge qatysty. Salyq tóleýshilerdi jedel qoldaý úshin MKD janyndaǵy konsýltatsııa keńseleri, call-ortalyq jáne SalykBot Telegram-arnasy turaqty jumys isteıdi.
5 qańtardan bastap barlyq oblys ortalyǵy men respýblıkalyq mańyzy bar qalalarda aptasyna úsh ret «Halyq býhgalteri» aktsııasy ótkizilýde. Oǵan jeti salalyq qaýymdastyqtyń atynan 100-den asa býhgalter qatysýda. 3 myńnan astam adam tegin keńes aldy.
Otyrys sońynda Serik Jumanǵarın reforma kezeńinde Salyq kodeksiniń normalaryn qalyptastyrýǵa jáne talqylaýǵa basa nazar aýdarylǵanyn, al ımplementatsııa kezeńinde olardy qoldanýdyń naqty merzimi, túsinikti tetikteri men boljamdylyǵy túıindi mánge ıe bolatynyn atap ótti.
– Júzege asyrý barysynda suraq sózsiz týyndaıtyny belgili. Eger olarǵa túsiniksiz jaýap berilse, vedomstvolarda kúrdeli máseleler jınalyp qalady. Jobalyq keńse bıznes máselelerin jedel jáne júıeli túrde sheshý úshin qurylady, — dedi ol.
Jobalyq keńseniń quramyna Qarjy mınıstrliginiń, Memlekettik kirister komıtetiniń, Ulttyq ekonomıka mınıstrliginiń, «Atameken» UKP, Tsıfrlyq damý mınıstrligi men Ádilet mınıstrliginiń ókilderi kirdi. Jobalyq keńseniń jumysyna salalyq qaýymdastyqtar, jeke salyq keńesshileri men sarapshylar qaýymdastyǵy da aralasady.
Aıta keteıik, Premer-mınıstr Oljas Bektenov orynbasary Serik Jumanǵarınge jańa Salyq kodeksin múddeli toptarmen qaıta pysyqtap shyǵýdy tapsyrǵan bolatyn.