Salyq kóbeıse, bıznes kóleńkege ketpeı me – Ulttyq ekonomıka mınıstri jaýap berdi

ASTANA. KAZINFORM – Elimizde salyq sany men kólemi kóterilse, bıznes ókilderi kásibin kóleńkeletip jibermeı me? Bul saýalǵa Kazinform agenttiginiń BIZDIÑ ORTA podkastynda Premer-Mınıstrdiń orynbasary – Ulttyq ekonomıka mınıstri Serik Jumanǵarın jaýap berdi. 

– Salyqty kóterse, bıznes kóleńkege ketedi degen pikirdi talaı estidim. Qazaqstannyń ishinde tirshilik jasap jatqan bıznestiń kóleńkege ketýine eshqandaı múmkindik joq. Tek qolma-qol aqshamen tóleseń ǵana, eshkim bilmeıdi. Biraq, qashanǵy qolma-qol tóleısiń, ondaı naryqty, satýshyny, satyp alýshyny qaıdan tabasyń? Uzaqqa barmaıdy. Ne de bolsa mobıldi aýdarymǵa kóshesiń, ol protsesti salyq komıteti, Ulttyq bank kórip otyr, elektrondy shot faktýra ashsa, birden kóremiz, - dedi Serik Jumanǵarın suhbat barysynda.

Ulttyq ekonomıka mınıstriniń málimdeýinshe, búginde salyq júıesi jaqsy damyǵan. 

– Sol sebepti, tyǵylýdyń qajeti joq, tyǵyla da almaısyń. Bıznes júrgizýdiń eki joly bar, biri – qazirgi joldan taımaý, eshteńeni ózgertpeý, odan jaǵdaı jyl saıyn qıyndaı beredi. Saldarynan salyq jınalmaıdy, búkil salmaq Ulttyq qorǵa túsedi, - deıdi Premer-Mınıstrdiń orynbasary. 

Aıta keteıik, 9 sáýirde Májilis Salyq kodeksiniń jańa jobasyn birinshi oqylymda maquldady.

Salyq kodeksiniń jańa jobasy boıynsha salyq esebin tapsyratyndar sany 30 paıyzǵa qysqarady.

Eske salsaq, qosylǵan qun salyǵy salynatyn aınalymnyń tómengi shegi 40 mln teńge bolady.

Sondaı-aq Serik Jumanǵarın korporatıvtik tabys salyǵynyń mólsherlemesi ósetin salalardy atady.