Salyq kóbeıedi, teńge nyǵaıady, jumys oryndary ashylady – ÓBK qaıta qaraý ne úshin mańyzdy

ASTANA. KAZINFORM – Májilis depýtaty, Ekologııa máseleleri jáne tabıǵat paıdalaný komıtetiniń tóraǵasy Edil Jańbyrshın iri ken oryndarynyń ónimin bólý kelisimin qaıta qaraý ne úshin mańyzdy ekenin, onda qaı baǵyttarǵa kóńil bólý qajettigin aıtyp berdi.

Prezıdent Qasym-Jomart Toqaev Úkimettiń keńeıtilgen otyrysynda iri ken oryndarynyń ónimin bólý jónindegi kelisimdi tıimdi ári jańa sharttarmen uzartý úshin kelissózderdi jandandyrýdy tapsyrǵan edi. 

Qazirgi tańda iri ken oryndarynyń ónimin bólý kelisimine saı jumys istep jatqan jobalar qataryna «Teńiz», «Qarashyǵanaq», «Qashaǵan» sekildi iri munaı-gaz ken oryndary bar.

− «Teńiz» ken ornyn ıgerýge qatysty kelisimge 1993 jyly qol qoıyldy. Ol 40 jylǵa, ıaǵnı 2033 jylǵa deıin eseptelgen. Sol sekildi 2038 jyly «Qarashyǵanaq», 2042 jyly «Qashaǵan» ken oryndarynyń kelisim merzimi aıaqtalady. Sol kelisimder aıaqtalǵanda, ÓBK qaıta jasaqtalýy nemese uzartylýy múmkin. Osy kezde biz memleket múddesin saqtap qalýymyz kerek. ıAǵnı bólinetin ónimniń úlken úlesi bizde bolýy kerek. Keıbir salyqtyq jeńildikterdi qaıta qaraý kerek. Eń bastysy – syrttan alatyn ımporttyq taýarlar úlesin óte azaıtyp, otandyq taýarlardy kóbeıtý kerek. Úsh iri operatormen ótken jınalysta Úkimetke otandyq taýarlar úlesin 70 paıyzǵa deıin jetkizý talabyn kelisimge engizýdi usyndym, − dedi E.Jańbyrshın agenttik tilshisine bergen suhbatynda.

Májilis depýtaty jańa Ónimdi bólisý kelisiminde kadrlyq máseleler, ǵylymǵa bólinetin aqsha, jergilikti taýarlardy alý máselesinde de memleket óz múddesin qorǵaýy keregin jetkizdi.

− Bul neni beredi? Eger biz ımporttyq taýarlardy otandyq taýarlarmen almastyrsaq, jańa jumys oryndary ashylady, jańa tehnologııa keledi, qyzmetkerlerimizdiń biliktiligi ósedi. Salyq bazasy kóbeıedi jáne teńgeniń turaqtylyǵyna áser etedi. Sebebi bul óte iri jobalar. Sondyqtan osyndaı ekonomıkaǵa úlken úles qosatyn, damýyna múmkindik beretin talaptardy osy kelisimde qaraýymyz kerek, − dedi Edil Jańbyrshın.

Sonymen birge, komıtet tóraǵasy ekologııalyq taza tehnologııalardyń engizilýi, jan-janýarlar álemin baqylaý, tartylyp jatqan teńizge qatysty kóptegen suraq kelisimdi qaıta qaraý kezinde kóterilýi kerek dep esepteıdi.

− Bul jumysty qazir bastaı berý kerek. Úkimet óz talaptaryn jınaqtap, sol jóninde konsýltatsııalar ótkizýi kerek dep esepteımin. «Teńiz» kelisiminiń aıaqtalýyna 7-8 jyl qaldy. Oǵan qazirden muqııat daıyndyqty bastaý kerek, − dedi spıker.

Buǵan deıin «Nort Kaspıan Opereıtıng Kompanı N.V.» JShS (NCOC) basqarýshy dırektory Djankarlo Rýıý Ónimdi bólý týraly kelisimdi (ÓBK) Qazaqstan úshin tıimdi sharttarmen uzartý máselesine qatysty suraqqa jaýap bergen edi.