Salyq eseptiligin keri qaıtaryp alýǵa ýaqytsha múmkindik berildi

ASTANA. KAZINFORM — Memlekettik kirister komıteti salyq tóleýshilerdiń tańdaǵan salyq salý rejımine ýaqytynda kóshýi úshin salyq eseptiligin keri qaıtaryp alýǵa ýaqytsha ruqsat berdi.

Bul múmkindik 2026 jylǵy 1 naýryzǵa deıin qoljetimdi bolady, ıaǵnı, osy kúnge deıin salyq eseptiligin keri qaıtaryp alý týraly ótinish beriledi. Bul ótinish eski jáne jańa STK júıelerinde ótpeli kezeń aıasynda qabyldanady.

— Mańyzdysy: salyq eseptiligin qaı júıede tapsyrsańyz, keri qaıtaryp alý týraly ótinishti de sol júıede berýińiz kerek. Mysaly, eger esepti jańa STK-de tapsyrǵan bolsańyz, ótinish te jańa STK-de beriledi. Al eski STK-de tapsyrylǵan esepti tek sol júıede ǵana qaıtaryp alýǵa bolady, — delingen komıtet habarlamasynda.

Sonymen qatar, jańa Salyq kodeksinde salyq eseptiligin keri qaıtaryp alý normasy alynyp tastalǵan. Sondyqtan bul múmkindikti tek salyq salý rejımin durys tańdaý nemese jeke kásipkerdiń qyzmetin toqtatý úshin ǵana paıdalaný qajet.

Budan buryn jańa kodeks boıynsha kásipkerler salyqty qalaı tóleıtinin aıtqan edik.