Salyq esebin ýaqytynda tapsyrmasa ne bolady
ASTANA. KAZINFORM – Bıyl 1 qańtardan bastap Qazaqstanda salyq eseptiligin usynýdyń jańa tártibi qoldanylady. Salyq kodeksiniń normalaryna sáıkes, belgilengen tapsyrý merzimi ótkennen keıin salyq organynyń aqparattyq júıesi tıisti salyq kezeńi úshin nóldik kórsetkishteri bar eseptilikti avtomatty túrde qalyptastyrady, dep habarlaıdy Astana boıynsha Memlekettik kirister departamenti.
Osyǵan baılanysty, salyq tóleýshiler «Salyq tóleýshiniń kabıneti» veb-qosymshasynda usynylýǵa tıis salyq eseptiligi nysandaryn (SEN) aldyn ala belgileýi qajet.
Іs-qımyl algorıtmi:
– «Salyq tóleýshiniń kabıneti» (SÁIJ) veb-qosymshasyna kirý;
– «Usynylatyn SEN» bólimine ótý;
– qoldanylatyn salyq rejımi men qyzmet túrine sáıkes qajetti salyq eseptiligi nysandaryn qosý;
– árbir SEN boıynsha tapsyrý bastalǵan «jyl men salyq kezeńin» kórsetý;
– engizilgen málimetterdi saqtaý.
– Bul rette nóldik kórsetkishteri bar eseptiliktiń avtomatty túrde qalyptasýy salyq tóleýshini is júzindegi salyq mindettemelerin kórsetý mindetinen bosatpaıdy. Eger eseptilik avtomatty túrde qalyptasqannan keıin salyq tóleýshide eseptilikte kórsetilýge tıis salyq salý obektileri naqty tirkelgen bolsa, ol tıisti salyq kezeńi úshin qosymsha salyq eseptiligin tapsyrýǵa mindetti, – dep túsindirdi Memlekettik kirister departamenti.
Atalǵan tártip jeke tulǵalardyń jeke kásipkerlikke qatysy joq qyzmeti boıynsha salyq eseptiligin usynýyna qoldanylmaıdy.
Osylaısha, eseptilikti nóldik kórsetkishtermen avtomatty túrde qalyptastyrý salyqtyq ákimshilendirýdi jeńildetýge jáne salyq tóleýshilerge túsetin ákimshilik júktemeni azaıtýǵa baǵyttalǵan.
Aıta keteıik, bıyl 1 qańtardan bastap Qazaqstanda jańa Salyq kodeksi kúshine enip, arnaıy salyq rejımderiniń sany qysqaryp, olardy qoldaný tártibi ózgerdi.
