Salyq-bıýdjet reformasy ekonomıkany damytýdyń pármendi tetigi bolmaq – Bektenov
ASTANA. KAZINFORM – Premer-mınıstr Oljas Bektenov ekonomıka jáne kásipkerlik salasyndaǵy sarapshylar qaýymdastyǵynyń ókilderimen kezdesti. Bul týraly QR Úkimetiniń baspasóz qyzmeti habarlady.
Premer-mınıstrdiń orynbasary – ulttyq ekonomıka mınıstri Serik Jumanǵarın elimizdegi qazirgi ekonomıkalyq jaǵdaı týraly baıandap, ónerkásipti damytý, ınfraqurylymdy jańǵyrtý, óńirlerde ósimniń jańa múmkindikterin iske qosý jónindegi mindetterdi sheshý úshin salyq-bıýdjet reformasyn júrgizý tásilderin aıtty.
Kezdesýge qatysýshylar memlekettik qarjyny turaqtandyrý jáne olardy tıimdi paıdalaný sharalary bekitilgen jańa Salyq jáne Bıýdjet kodeksteri jobalaryn talqylady.
Basqosý barysynda «Atameken» UKP tóralqa tóraǵasy Raıymbek Batalov, «Qazaqstan mashına jasaýshylar odaǵy» ZTB basqarma tóraǵasy Meıram Pishembaev, «Taý-ken óndirý jáne taý-ken metallýrgııa kásiporyndarynyń respýblıkalyq qaýymdastyǵy» ZTB atqarýshy dırektory Nıkolaı Radostovets, «Qazaqstannyń qurylys salýshylar qaýymdastyǵy» ZTB prezıdenti Vıktor Mıkrıýkov, «Atameken» UKP tóralqasy Farmatsevtıkalyq, medıtsınalyq ónerkásip jáne medıtsınalyq qyzmetter komıtetiniń tóraǵasy Nurjan Otarbaev, «Qazaqstan qarjygerleriniń qaýymdastyǵy» ZTB Keńesiniń tóraǵasy Elena Bahmýtova, «KAZENERGY» Qazaqstan munaı-gaz jáne energetıka kesheni uıymdarynyń qaýymdastyǵy» ZTB tóraǵasy Maǵzum Myrzaǵalıev usynylyp otyrǵan ózgeristerdiń ekonomıkanyń túrli salalaryna áseri týraly aıtty.
L.N. Gýmılev atyndaǵy Eýrazııa ulttyq ýnıversıteti Dırektorlar keńesiniń tóraǵasy Jaqsybek Qulekeev, «NAC Analytica» Korporatıvtik qory basqarmasynyń tóraǵasy Rasýl Rysmambetov, «Dasco Consulting group» JShS basqarýshy seriktesi Dármen Sádýaqasov, «Fortune Partners» JShS bas dırektory, MNU salyq quqyǵy mektebiniń basshysy Dana Toqmýrzına, QM Memlekettik qarjy jónindegi qoǵamdyq keńesiniń tóraǵasy Rýstam Júrsinov, «Kommentarıı» taldaý tobynyń jetekshisi, ekonomıst Eldar Shamsýtdınov baıypty pikirlerin ortaǵa saldy. Sondaı-aq talqylaýǵa «Talap» Qoldanbaly zertteýler ortalyǵynyń dırektory Rahym Oshaqbaev, «DESHT» taldaý ortalyǵynyń jetekshisi Qýanysh Jaıyqov, ekonomıst Ǵalymjan Aıtqazın, táýelsiz qarjy sarapshysy Andreı Chebotarev, «Visor Kazakhstan» ınvestıtsııalyq kompanııasynyń basqarýshy seriktesi Almas Chýkın jáne basqalar qatysty.
Premer-mınıstr kezdesýge qatysýshylarǵa syndarly dıalog úshin alǵys bildirip, Ulttyq ekonomıka, Qarjy mınıstrlikterine salyq-bıýdjet salasyn reformalaý máseleleri boıynsha aıtylǵan usynystardy pysyqtaýdy tapsyrdy.
– Prezıdent naqty sektordy damytýdy kúsheıte otyryp, ekonomıka qurylymyn ózgertý mindetin qoıdy. Sondyqtan talqylanatyn reformalar elimiz úshin mańyzdy. Salyq-bıýdjet reformasy ekonomıkany odan ári damytý jónindegi jumysty jetildirýdiń pármendi tetigi bolmaq, - dep atap ótti Oljas Bektenov.
Úkimet ekonomıkalyq ósýdi yntalandyrýdyń barynsha tıimdi sharalaryn pysyqtaý úshin sarapshylarmen belsendi túrde jumys isteýdi jalǵastyrýda.