Salyq boıynsha jańa túzetýler tamyz aıynyń sońyna deıin daıyn bolady
ASTANA. KAZINFORM – QR Ulttyq ekonomıka birinshi vıtse-mınıstri Azamat Ámrın mınıstrlik Salyq kodeksine jańa túzetýler daıyndalyp jatqanyn málimdedi.
Onyń sózinshe, túzetýler Parlament qaraýyna qyrkúıek aıynda engiziledi. Al mınıstrlik mamandary qazirdiń ózinde atalǵan túzetýlerge qatysty 86 suraqty qarastyrǵan.
– Zańdy ázirleý jumysy jalǵasyp jatyr. Jobalyq keńse aıasynda 86 suraqty qarastyrdyq. Onyń aıtarlyqtaı bóligi zańnamaǵa ózgerister men tolyqtyrýlar túrinde engiziletini daýsyz, – dedi Azamat Ámrın.
Onyń sózinshe, usynylyp otyrǵan ózgeristerdiń biri – múgedektigi bar azamattardyń múgedektik toby bir jyl ishinde aýysqan jaǵdaıda salyq shegerimi tártibin ózgertý.
Óıtkeni, buǵan deıin múgedektigi bar azamattardyń múgedektik toby ózgergende, salyq shegeriminiń kólemi jóninde máseleler týyndaǵan.
– Biz zańnamany bir jyl ishinde múgedektik toby ózgergen jaǵdaıda azamattarǵa tıimdi bolatyndaı ózgertkimiz keledi. Salyq shegerimi buryn joǵary bolsa, jyl sońyna deıin sol deńgeıde saqtalady, – dep túsindirdi ol.
Sonymen qatar, mınıstrlik QQS normalaryn qaıta qarastyrýdy josparlap otyrǵan joq.
– QQS-ny ózgertý josparda joq. Biraq ázirge barlyq túzetý jóninde aıtýǵa erte. Zańnama daıyn bolǵanda, tolyq málimet beremiz, – dedi vıtse-mınıstr.
Onyń sózinshe, qujat tamyz aıynyń sońyna qaraı ázir bolyp, qyrkúıekte Quryltaı qaraýyna engiziledi.
Aıta keteıik, buǵan deıin salyq organdary zańsyz QQS shemalaryna qarsy baqylaýdy kúsheıtkenin jazǵanbyz.
