Salyq boryshyn 31 naýryzǵa deıin japqandardyń ósimpuly men aıyppuly keshiriledi
ASTANA. KAZINFORM — Qarjy mınıstrligi Memlekettik kirister komıtetiniń Aýdıt departamenti bereshekpen jumys basqarmasynyń basshysy Qaısar Aryn jańa kelesi aptada salyq bereshegin ósimpul men aıyppulsyz tóleı alatyn bar kásipkerlerdiń tizimi jarııalanatynyn aıtty.
— Úkimet mıkro, shaǵyn bıznes sýbektilerin jańa Salyq kodeksine beıimdeıtin sharalardyń keshenin pysyqtaǵan. Sol Qaýly aıasynda Qarjy mınıstriniń buıryǵy ázirlenip, Ádilet mınıstrligine tirkeýge jiberildi. Tirkeýden ótkennen keıin búkil BAQ-ta jarııalanady.
Bul buıryqtyń kúshi tek bıýdjettik synyptama kody boıynsha eseptelgen salyq bereshegine ǵana júredi. Osy bereshek 1 qańtardan 31 naýryzǵa deıin tólense, salyq organy osy bereshekke eseptelgen ósimpul men aıyppuldardy avtomatty túrde esepten shyǵarady. Biraq bul mıkro jáne shaǵyn bıznes sýbektilerine ǵana qoldanylady. Salyqtyń negizgi somasy tólese, aıyppul men ósimpuly joıylady degen sóz ǵoı, — dedi basqarma basshysy.
Salyq bereshegi bólip tólep jatqandar men keıinge qaldyrǵandar da 31 naýryzǵa deıin salyqtyń negizgi bóligin tólep úlgerse, ósimpul men aıyppul keshiriledi.
— Salyq tóleýshi sot arqyly bankrottyq protsedýraǵa kóshken bolsa nemese ońaltý, qaıta qurylymdaý protsedýralaryn bastan ótkerip jatsa da 31 naýryzǵa deıin negizgi salyqty tóleý arqyly aıyppul men ósimpuldan qutyla alady. 275-bap boıynsha qosylǵan qun salyǵynyń sheginen asqany úshin aıyppul salynǵan bolsa, ol da keshiriledi, — dedi Qaısar Aryn.
Sondaı-aq, ol Qarjy mınıstriniń tıisti buıryǵy jarııalanǵannan keıin salyq bereshegin ósimpul men aıyppulsyz tóleýge quqyǵy bar tóleýshilerdiń tizimi jarııalanatynyn aıtty.
— Respýblıka boıynsha tizim qalyptastyrýǵa tyrysamyz. Ony ózimizdiń resmı saıtqa shyǵaramyz. Ol tizim Exel keste formatynda bolatyn shyǵar. Salyq tóleýshi óziniń JSN-in nemese BSN-in engizý arqyly tizimde óziniń bar-joǵyn bile alady. Bar bolsa, 31 naýryzǵa deıin salyq beresheginiń negizgi somasyn tólep úlgerýi kerek. Salyq organdarynyń arnaıy komıssııasy ondaı bereshekterdiń ósimpuly men aıyppulyn keshiredi, — dedi salyq organynyń ókili.
Buǵan deıin 6,5 mln teńgege deıingi salyq bereshegin kepildiksiz bólip tóleýge ruqsat beriletinin jazǵan edik.