Salyq bereshegi qansha bolsa, shetelge shyǵýǵa shekteý qoıylady
ASTANA. KAZINFORM — 2026 jylǵy 1 qańtardan bastap Qazaqstanda salyq bereshegin májbúrlep óndirip alý tártibi ózgerdi. Endi óndirip alý sharalary bereshek somasyna qaraı qoldanylady.
Buǵan deıin táýekelderdi basqarý júıesin eskere otyryp, bereshek 1 teńgeden bastalǵan jaǵdaıda da óndirip alý sharalary qoldanylýy múmkin edi.
Jańa tártip boıynsha, bereshek mólsheri 20 AEK-ten az bolsa, salyq tóleýshige bereshegi týraly habarlama jiberilip, ósimpul esepteledi. Bul jaǵdaıda ózge óndirip alý sharalary qoldanylmaıdy.
— Bereshek 20 AEK-ten 45 AEK-ke deıin bolsa, ony óteý týraly habarlama jiberiledi. Sonymen qatar bank shottary men kassa boıynsha shyǵys operatsııalary toqtatyla turyp, ınkassalyq ókimder shyǵarylady. Al bereshek 45 AEK-ten asqan jaǵdaıda múlikti tizimdeý jáne ótkizý, sondaı-aq debıtorlar esebinen óndirip alý sııaqty zańnamada kózdelgen barlyq shara qoldanylady, — delingen habarlamada.
Budan bólek, 2026 jylǵy 1 shildeden bastap Salyq kodeksine Qazaqstannan shyǵýdy ýaqytsha shekteý týraly norma engizildi. Bul sharany is júzinde qoldaný 1 qazannan bastaldy.
Atalǵan shekteý salyq bereshegi 27 000 AEK-ten asyp, ol úsh aıdan astam ýaqyt boıy ótelmegen jaǵdaıda qoldanylýy múmkin.
Shekteý dara kásipkerlerge, jeke praktıkamen aınalysatyn adamdarǵa, sondaı-aq zańdy tulǵalardyń birinshi basshylaryna nemese olardyń mindetterin atqaratyn adamdarǵa qatysty qoldanylady.
Qazaqstannan shyǵýdy ýaqytsha shekteý iri mólsherdegi bereshek bolǵanda jáne sot sanktsııalaǵannan keıin ǵana engiziledi. Memlekettik kirister organy tıisti qaýly shyǵaryp, ony sotqa joldaıdy. Sot sanktsııa bergen soń qaýly memlekettik kirister organdarynyń aqparattyq júıesi arqyly oryndaý úshin ýákiletti aqparattyq júıege jiberiledi.
Eske salaıyq, buǵan deıin Qazaqstanda salyq bereshegine baılanysty 700-ge jýyq jeke kásipker men kásiporyn basshysynyń shetelge shyǵýyna ýaqytsha shekteý qoıylýy múmkin ekenin jazǵanbyz.
