Salyq bereshegi 86 500 teńgege jetpeıtinderdiń shottary buǵattalmaıdy
ASTANA. KAZINFORM — Qarjy mınıstrligi Memlekettik kirister komıtetiniń Aýdıt departamenti bereshekpen jumys basqarmasynyń basshysy Qaısar Aryn jańa 2026 jyldyń birinshi qańtarynan bastap salyq bereshegin óndirip alýdyń tártibi qalaı ózgergenin aıtty.
— Salyq bereshegi bar ekeni týraly habarlama jiberý tártibi ózgerdi. Eger salyq beresheginiń somasy 20 aılyq eseptik kórsetkishke (86 500 teńgege) deıin bolsa, eshqandaı shara qoldanbaı, tek ósimpul eseptep, habarlama jiberýmen shektelemiz. Ol habarlamada salyq tóleýshiniń qansha bereshegi bar ekeni kórsetiledi. Al salyq beresheginiń somasy 20 AEK-ten assa, salyq organy habarlamanyń basqa túrin jiberedi. Bul habarlamada memlekettik kirister organdary qoldanatyn jumystardyń tolyq tsıkli qarastyrylǵan. Basqasha aıtsaq, ósimpul eseptelip, shyǵys operatsııalary buǵattalady, ınkassalyq ókimhat arqyly óndirip alý (boryshkerdiń shotyndaǵy aqshadan bereshekti májbúrlep óndirý) sharalary qabyldanady, — dedi ol.
Bul sharalar salyq beresheginiń somasy 20 AEK-ten 45 AEK-ke (194 625 teńgege) deıin bolǵanda qoldanylady.
— Al salyq bereshegi 45 AEK-ten assa, óndirip alýdyń barlyq túri qoldanylady. Ári qaraı debıtordyń shotynan bereshek óndirip alynýy múmkin. Múlikti tizimdeý aktisi toltyryp, keıin qaryzdy óndirý úshin satylady. Tipti sot sheshimimen salyq tóleýshini bankrot dep taný sharasy da qarastyrylǵan.
Eger salyq tóleýshi habarlamany jeke kabınetinen kórgeni elektrondy tsıfrlyq qoltańba arqyly kirý faktisi boıynsha dáleldenedi. Al ondaı dálel bolmaǵan jaǵdaıda habarlama poshta arqyly, kýrerlik qyzmet arqyly qaǵaz kúıinde jetkiziledi, — dedi Qaısar Aryn.
Salyq organynyń ókili bul tártip 2026 jyldyń 1 qańtaryna jetken jáne 2026 jyldyń ishinde tólengen salyq bereshegine qatysty ekenin eske saldy.
Buǵan deıin 6,5 mln teńgege deıingi salyq bereshegin kepildiksiz bólip tóleýge ruqsat beriletinin jazǵan edik.