Salyq bereshegi 5,8 mln teńgeden aspaıtyn kásipkerler tólem merzimin kepilsiz ózgerte alady
ASTANA. KAZINFORM – Memlekettik kirister komıteti Bereshekpen jumys basqarmasy basshysynyń orynbasary Araılym Esqalıeva 2026 jyly kúshine enetin jańa kodeks salyq mindettemesin oryndaý merzimin shegerý tártibi qalaı ózgeretinin túsindirdi.
- Jańa salyq kodeksinde salyq mindettemesin oryndaýdyń merzimin ózgertýge baılanysty da ózgerister bar. Salyq mindettemesiniń kólemi 1,5 myń aılyq eseptik kórsetkishke (5,8 mln teńge) jetpeıtin salyq tóleýshilerge mindetteme merzimin kepilsiz ózgertýge ruqsat beriledi. Basqasha aıtsaq, salyq bereshegi 5,7 mln teńgege jetpeıtin salyq tóleýshiler tólem merzimin kepil qoımaı-aq ózgerte alady, - dedi ol.
Qazir qoldanystaǵy kodeks boıynsha salyq mindettemesin oryndaý merzimin ózgertýge ruqsat alý úshin mindetti túrde múlik túrinde, bank sharty túrinde kepildik qoıý kerek.
- Kepilsiz ózgertý quqyǵyna ıe bolǵysy keletin salyq tóleýshiniń moınynda budan basqa merzimi ózgertilgen jáne tolyq tólenip bitpegen salyq bereshegi bolmaý kerek. Salyq tóleýshige salyq organdarynan tólenbegen salyq týraly mindetti habarlama jiberilmegen bolý qajet. Salyq tóleýshiniń kásipkerlik qyzmeti toqtatylmaǵan bolýy shart. Qazirgi kodeks boıynsha salyq tóleýshi keıingi 3 jyl ishinde tólem merzimin ózgertýge ruqsat alyp, tólem kestesin buzǵany úshin ol ruqsattan aıyrylǵan bolsa, jańa kodekste bul merzim eki jyl dep belgilenip otyr. 2026 jyldan bastap mundaı ótinishti qaraý merzimi 20 jumys kúninen 10 jumys kúnine qysqartyldy, - dedi maman.
Aıta ketý kerek, Qazaqstan zańnamasynda ýaqytsha qarjylaı qıyndyqqa tap bolǵan salyq tóleýshilerge salyq bereshegin keıinge qaldyrý, tóleý merzimin keıinge shegerý múmkindigi qarastyrylǵan. Araılym Esqalıevanyń aıtýyna qaraǵanda, onyń eki merzimi bar. Birinshisi – bereshekti 6 aıǵa deıin shegerip, bir jolda tóleý múmkindigi. Ekinshisi – aı saıyn nemese 3 aı saıyn 3 jylǵa deıingi merzim ishinde bólip tóleý múmkindigi.
- Salyq beresheginen bólek jer telimin paıdalanǵany úshin, jer betindegi sý kózderin paıdalanǵany úshin jáne qorshaǵan ortaǵa keri áser tıgizgeni úshin alynatyn tólemderdiń merzimin de ózgertýge bolady. Al tólem kózderinen ustalatyn jeke tabys salyǵy, aktsızder, Eýrazııalyq ekonomıkalyq odaq aýmaǵynan ımporttalatyn qosylǵan qun salyǵy, bonýstar men Ulttyq qorǵa tólenetin salyq túrleriniń merzimin ózgerýge ruqsat joq, - deıdi ol.
Salyq tóleýshiler mundaı ótinishti halyqqa qyzmet kórsetý ortalyqtaryna nemese salyq organdaryna baryp, salyq tóleýshiniń jeke kabıneti arqyly onlaın rejımde bere alady.
Komıtet ókili ótinish ıesi kepil retinde energııamen, jylýmen, sýmen jabdyqtaıtyn nysandardy, tárkilengen múlikterdi, jalǵyz baspanany, tez búlinetin shıkizat pen azyq-túlikti qoıa almaıtynyn atap ótti.
Buǵan deıin salyq bereshegin keıinge shegerýge negiz bolatyn sebepterdi atap jazǵan edik.