Salıha Qojaqovanyń mereıtoılyq keshi ótedi

1958-1960 jyldary M.Áýezov atyndaǵy akademııalyq drama teatrdyń janyndaǵy ekijyldyq stýdııada oqyǵan aktrısa ony bitirgen soń óner ordasynyń akterlik tobyna jumysqa qabyldanǵan edi. Sol ýaqyttan beri úzilissiz eńbek etip kele jatqan óner sheberi ulttyq jáne álemdik dramatýrgııanyń túrli janrynda 50-den astam róldi somdady. M.Áýezovtiń «Qara qypshaq Qobylandysynda» Qarlyǵash, «Aıman-Sholpanynda» Sholpan, «Qaragózinde» Aqbala, «Abaı» tragedııasynda Maǵysh, «Túngi sarynynda» Mórjan, Q.Shańǵytbaev pen K.Baıseıitovtiń «Beý, qyzdar-aı!» men «Oı, jigitter-aı!» komedııalarynda Jansulý, Á.Nurpeıisovtiń «Qan men terinde» Qaraqat, Q.Muhamedjanovtyń «Bóltirik bórik astyndasynda» Jámıla, «Biz perishte emespizinde» Ana, D.Isabekovtiń «Muragerlerinde» Raıhan, «Kishkentaı aýylynda» Zeınep, A.Súleımenovtiń «Jetinshi palatasynda» Kempir, I.Orazbaevtyń «Men ishpegen ý bar ma?» dramasynda Nurǵanym, A.Tasymbekov pen Q.Ysqaqtyń «Kebenek kıgen arýlarynda» Halıma, R.Muqanovanyń «Máńgilik bala-beınesinde» Qatsha, N.Gogoldiń «Úılenýinde» Dýnıasha, N.Hıkmettiń «Farhad-Shyrynynda» kútýshi áıel, Sh.Aıtmatovtyń «Ana-Jer-anasynda» Álıman, S.Ahmadtyń «Kelinder kóterilisinde» Lýftı, «Kúıeýinde» Rahıma, F.Bólekovtiń «Otyz ulyń bolǵanshasynda» Bıbihan, B.Jákıevtiń «Júreıik júrek aýyrtpaı...» dramasynda Sypaıynyń rólin sahnalady. Teatrdaǵy eren eńbegi úshin 1983 jyly Qazaqstannyń eńbek sińirgen artısi qurmetti ataǵyn alǵan kıno salasynda da kóptegen rólderdi oınady. Atap aıtqanda Sháken Aımanov atyndaǵy "Qazaqfılm" kınostýdııasy túsirgen «Meniń atym Qoja», «Án qanatynda», «Dolana», «Shoqan Ýálıhanov», «Bes aǵaıyndy» jáne táýelsiz kınostýdııalarda birneshe fılmge tústi.