Salǵyrt qurylysshylarmen kelisimdi územiz - elorda ákimi
NUR-SULTAN. QazAqparat - Elorda ákimi Altaı Kólginov Esil aýdanyndaǵy birqatar áleýmettik nysan qurylysymen tanysty, dep habarlaıdy QazAqparat tilshisi.
«Jeńildikpen beriletin baspana salý rekordyn bıyl da qaıtalaý úshin alǵysharttaryn byltyr-aq daıyndaǵan edik. Birneshe áleýmettik baspana ǵımaraty turǵyzylatyn osy aýdanda 2 myń oqýshyǵa shaqtalǵan mektep te salynyp jatyr, osylaısha, eki aýysymda oqıtyn qosymsha 4 myń oqýshy qamtylady», - dep jazdy ákim Instagram jelisinde.
Sonymen birge, ol qurylys qarqynyn báseńdetpeýdi, úıler men oqý nysandarynyń sapasyn erekshe nazarda ustaýdy tapsyrdy.
«Salǵyrt qurylysshylarmen kelisimdi úzip, qara tizimge kirgizetin bolamyz», - deıdi A. Kólginov.
Bıyl, shamamen 10 myń - jeńildikpen beriletin baspana tapsyrylady dep josparlanǵan. Salystyrý úshin: jeńildikpen 2018 jyly - 1 100 páter, 2019 jyly – 2 900, al 2020 jyly - 7 myńnan astam áleýmettik baspana berilgen.
«Memleket basshysynyń nusqaýymen jeńildikpen beriletin baspana qurylysyn júıeli túrde arttyryp jatyrmyz. Bilim oshaqtarynyń qurylysyna keletin bolsaq, bıyl barlyǵy 40 myń orynǵa mektepter ashamyz. Bul byltyrmen salystyrǵanda eki esege, al 2019 jylmen salystyrǵanda tórt ese kóp. Endi mektepterdi gabarıtti etip salýǵa kóshpekpiz. Buǵan qosa, 5-jyldyq keshendi josparǵa sáıkes memlekettik 50 mektep salamyz. Bilim oshaqtarynyń qurylysyna jeke ınvestıtsııa da tartylyp jatyr», - deıdi Altaı Kólginov.
