Sálemniń ózi nıetten bastalady
ASTANA. KAZINFORM — Keıingi ýaqytta qoǵamda ádep, úlkenge qurmet jáne amandasý mádenıetine erekshe mán berilip júr. Bul máselege ımam Nurlan Baıjigituly «BIZDIN ORTA» podkastynda pikir bildirdi.
Onyń aıtýynsha, Memleket basshysynyń amandasý men qyzmettik qarym-qatynas mádenıetine nazar aýdarýy qoǵamdaǵy ádep máselesine mán berýdiń qajettigin kórsetedi.
— Memleket basshysy osyny baıqap, áý bastan, sálemniń óz orny bar ekenin aıtyp, «máke», «sáke» dep jónsiz ataýdy qoıyp, tıisti jumysty talap etip keledi. Bul — isker adamnyń tirligi. Bir ǵajap sóz esimde qalypty «ekeýimizdiń dostyǵymyz kúshti, biraq memlekettiń múddesi men úshin bárinen joǵary turady». Sondyqtan memlekettiń talaby oryndalýy kerek. Dostyq — dostyq bolyp qala beredi, — dedi ol.
Imam qazaq qoǵamyndaǵy amandasý dástúriniń adamnyń jasyna, mártebesine jáne ornyna qaraı qalyptasqanyn atap ótti.
Onyń sózinshe, ustazǵa, ǵalymǵa, ata-anaǵa jáne zııaly aqsaqaldarǵa eki qoldap sálem berý — qurmettiń belgisi. Alaıda qurmet pen jaǵympazdyqtyń ara-jigin ajyrata bilý qajet.
— Biz shekten shyǵyp, ıilip sálem berip, tym qatty jaǵympazdyqqa barmaýymyz kerek. Sol jaǵympazdyqtan týyndaıtyn nárselerdi ózimiz doǵarýymyz qajet, — dedi Nurlan Baıjigituly.
Ol sálemdesýdiń syrtqy rásim ǵana emes, adamnyń ishki nıetimen baılanysty ekenin aıtty.
— Sózdiń atasy — sálem. Sálemimiz bolýy kerek. Qazaqta «sálemimiz durys bolsyn» degen sóz bar. Eger urpaqtan-urpaqqa jalǵasyp kele jatqan sálemimiz durys bolsa, nıetimiz de durys degen sóz. Sálem nıet buzylǵanda buzylady. Sálemniń ózi nıetten bastalady, — dep túıindedi ımam.
Buǵan deıin dinı qaýym ádep pen bilimdi qatar dáripteýdiń mańyzyn aıtty.
https://kaz.inform.kz/news/dni-kauim-adep-pen-blmd-katar-darpteudn-manizin-aytti-13487600
