Sálemdemeńiz jetkiziledi: Bas prokýratýra alaıaqtyqtyń jańa túri týraly eskertti
ASTANA. KAZINFORM – Qazaqstanda alaıaqtar «Qazposhta» qyzmetkerleriniń atyn jamylyp, azamattardyń jeke derekterin urlaýǵa árekettenip jatyr. Bas prokýratýra qazaqstandyqtardy ınternet-alaıaqtyqtyń jańa shemasynan saq bolýǵa shaqyrdy.
Vedomstvo málimetinshe, qaskúnemder ózderin «Qazposhta» AQ ókilderi retinde tanystyryp, azamattarǵa poshta jóneltilimderin jetkizý týraly jalǵan habarlamalar jiberip jatyr.
Atap aıtqanda, 2026 jylǵy 9 qarashadan bastap +212 6 12 82 15 27 sheteldik telefon nómirinen sálemdemeniń jaqyn arada jetkiziletini týraly habarlamalar taraǵany tirkelgen. Mundaı habarlamalar basqa nómirlerden de kelýi múmkin.
Alaıaqtar jetkizý mekenjaıyn naqtylaý qajettigin syltaýratyp, azamattarǵa habarlamadaǵy siltemege ótip, jetispeıtin málimetterdi toltyrýdy usynady.
Habarlamanyń shynaıy ekenine sendirý úshin siltemege ótý tártibi kórsetilgen arnaıy nusqaýlyq ta jiberiledi.
Alaıda silteme poshta qyzmetiniń resmı saıtyna uqsatyp jasalǵan jalǵan ınternet-resýrsqa aparady. Bul – azamattardyń derbes derekterin jınaýǵa arnalǵan fıshıngtik saıt.
Onyń kómegimen alaıaqtar paıdalanýshylardyń turǵylyqty mekenjaıyn jáne basqa da qupııa málimetterin ıemdenýge tyrysady.
Bas prokýratýranyń málimetinshe, alaıaqtar sálemdemeni jetkizý týraly habarlamaǵa uqsatyp jasalǵan fıshıngtik ınternet-resýrsty paıdalanǵan. Saıttyń syrtqy kórinisi men mazmuny poshta qyzmetiniń resmı habarlamasy sııaqty áser qaldyryp, azamattardy jańylystyrýǵa baǵyttalǵan.
Ásirese jalǵan habarlamalardyń qazaq tilinde jiberilýi qaýip tóndirip otyr. Óıtkeni memlekettik tilde jazylǵan mátin alýshylardyń senimin arttyryp, qyraǵylyǵyn tómendetýi múmkin.
Qaskúnemder resmı-iskerlik stıldi, poshta qyzmetine tán sóz tirkesteri men belgilerdi qoldanady. Sonyń saldarynan azamattar habarlamany shynaıy dep qabyldap, kúmándi siltemege ótýi nemese jeke derekterin engizýi múmkin.
– Alaıaqtyq habarlamalardyń memlekettik tilde jiberilýi erekshe qaýip tóndiredi, óıtkeni ony paıdalaný senim týdyrady jáne alýshynyń qyraǵylyǵyn tómendetedi. Habarlamalar resmı-iskerlik stıldi, poshta qyzmetiniń habarlamalaryna tán tujyrymdar men atrıbýttardy qoldana otyryp resimdeledi. Nátıjesinde alýshylarda habarlamanyń túpnusqalyǵy týraly jalǵan áser qalyptasady, bul zııandy siltemelerge ótý, derbes derekter men aqshalaı qarajatty qaskúnemderge berý qaýpin arttyrady, – delingen Bas prokýratýra aqparatynda.
Vedomstvo azamattardy tsıfrlyq qaýipsizdik talaptaryn saqtaýǵa shaqyrady. Atap aıtqanda, kúmándi siltemelerge ótpeý, belgisiz ınternet-resýrstarǵa jeke jáne banktik derekterdi engizbeý qajet.
Sondaı-aq poshta jóneltilimderin jetkizý týraly aqparatty tek poshta qyzmetteriniń resmı arnalary arqyly teksergen jón.
Bas prokýratýra sálemdeme týraly qarapaıym habarlamanyń artynda azamattardyń derbes derekteri men aqshasyn urlaýǵa baǵyttalǵan alaıaqtyq áreket jasyrynýy múmkin ekenin eskertti.
Aıta keteıik, buǵan deıin alaıaqtardyń «Qazposhta» qyzmetkerleri atynan habarlasyp, azamattardan SMS arqyly kelgen rastaý kodtaryn suraıtyny týraly eskertilgen bolatyn.