«Sálem, Qazaqstan!» jobasynda Aqbota Kerimbekova men Serjanáli Álibek jańa ánniń tusaýyn kesti
ASTANA. QazAqparat - 31 naýryzda ótken «Sálem, Qazaqstan!» jobasynyń kezekti túsirilimi Aqbota Kerimbekovaǵa arnaldy, dep habarlady «Qazaqstan» RTRK» AQ baspasóz qyzmeti.
Aqbota Kerimbekova «Serper» jastar syılyǵynyń ıegeri, ol qazaq estradasynda «Appaq gúlder» ánimen tanylǵan.
Aqbota Kerimbekovanyń «Sálem, Qazaqstan!» jobasyndaǵy keshi «Men qazaq qyzdaryna qaıran qalam» ánimen ashyldy. Ánshi sahnada júrgenine 20 jyl bolǵandyǵyn aıtty. Sahnada ol eń tańdaýly «Sensiń», «Qýanyshym qazynam», «Arman-aı», «Ýaqytsha», «Jeńemin», «Múmkin emes», «Kelem deshi» syndy ánderin jandy daýysta oryndady.
Sonymen qatar, keshte Aqbota Kerimbekova ánshi Serjanáli Álibekpen jańa ánniń tusaýyn kesti.
Sondaı-aq, Aqbota Kerimbekova hıt ánderiniń birine aınalǵan «Qosh mahabbat» ánin kúısandyqtyń súıemeldeýimen oryndady. Ánshi 20 jyldyǵyna oraı kúzde jeke keshin ótkizýdi josparlaýda. Jobada bolǵan ózge de qyzyqtardy aldaǵy ýaqytta Ulttyq arnanyń «Sálem, Qazaqstan!» jobasynan kóre alasyzdar.
Eske salsa keteıik, 25 naýryzdan bastap «Qazaqstan» telearnasy «Sálem, Qazaqstan!» atty jańa televızııalyq jobany kórsetýde. Bul qazaqstandyq estradanyń jaryq juldyzdary jandy daýysta án shyrqaıtyn biregeı jobasy. Ár juma kúni saǵat 21:05 «Qazaqstan» telearnasynyń efırinen beriletin súıikti ánshilerd3ń jandy daýystaǵy oryndaýlaryn tamashalaı alady.
