«Sálem, elorda!» respýblıkalyq óner festıvaliniń gala-kontserti ótti
NUR-SULTAN. QazAqparat - «Sálem, Elorda!» І respýblıkalyq óner festıvali óz máresine jetti. Óner festıvaliniń jetistikteri «Qazaqkontsert» memlekettik kontserttik uıymynda ótken dóńgelek ústel barysynda qorytyndylandy, dep habarlaıdy QazAqparat tilshisi.
Dóńgelek ústel otyrysyna elimizdiń ár óńirine qarasty 17 fılarmonııanyń basshylary qatysty. Shara barysynda festıval nátıjesimen birge óner salasyndaǵy ózekti máseleler de talqylanady.
QR Mádenıet jáne sport mınıstrligi Mádenıet jáne óner departamentiniń dırektory Kúmis Seıitova birlesip ótkizilgen mádenı is-sharalarǵa kóz júgirtip, aldaǵy josparlardy naqtylaýda mundaı júzdesýlerdiń mańyzy zor ekendigin aıtty.
Sonymen qatar ol «QR Mádenıet týraly» zańyna engen ózgerister men tolyqtyrýlarǵa, el óńirlerindegi mádenıet pen óner salasynyń damýyna toqtaldy.
Al «Qazaqkontsert» memlekettik kontserttik uıymynyń dırektory Jeńis Seıdýllauly «Respýblıkalyq kontserttik-gastroldik qyzmet ortalyǵynyń» jumysyn joǵary baǵalady.
«Onlaın jınalystar barysynda Kontserttik-gastroldik ortalyq sizder kótergen ózekti máselelerdiń sheshimin taýyp, nátıjeli jumys istedi dep oılaımyn. Aldaǵy ýaqytta da óńirlik fılarmonııalar men shyǵarmashylyq ujymdardy qoldaıtyn bolamyz. Mádenıet jáne sport mınıstrliginiń bastamasymen júzege asyp jatqan «Sálem, Elorda!» І respýblıkalyq óner festıvali mádenıet salasyndaǵy eleýli is-sharanyń birine aınaldy. Meniń oıymsha, óńirlerdegi ozyq oryndaýshylar men úzdik shyǵarmashylyq ujymdardy qalyń buqaraǵa tanytý úshin osyndaı mańyzdy jobalardyń qataryn arttyra berýimiz qajet»,- dedi Jeńis Seıdýllauly.
Іs-shara barysynda «Qazaqkontsert» uıymy óz tájirıbesin bólisip, «Qazaqstan» ortalyq kontsert zaly boıynsha ekskýrsııa júrgizildi. Sondaı-aq uıymdastyrýshylar tarapynan óńirlik fılarmonııalarǵa estelik syılyq tabystaldy.
Budan bólek, «Qazaqstan» ortalyq kontsert zalynda «Sálem, elorda!» І respýblıkalyq óner festıvali gala-kontsertiniń televızııalyq túsirilimi ótti.
Festıvaldiń gala-kontsertinde óńirlik óner uıymdarynyń úzdik kontserttik nomerleri toptastyrylady.
Kórermen bul kontsertti Táýelsizdik merekesine oraı 17 jeltoqsanda «Habar» telearnasynan kóre alady.
Eske salsaq, atalǵan óner festıvali 2020 jyldyń 20 qarashasynda saltanatty túrde bastaý alǵan bolatyn. Іs-sharaǵa respýblıka óńirlerindegi barlyq memlekettik kontserttik uıymdar qatysýda.
Festıvaldiń maqsaty – óńirlerdiń mádenı jetistikteri men ónerin keńinen nasıhattap, talantty oryndaýshylardy qoldaý.
