«Sálem, Elorda!» óner sherýi máresine jetti
Jıynda vıtse-mınıstr Nurǵısa Dáýeshov óńirlerdiń ózara qarym-qatynasyn arttyra túsetin «Sálem, Elorda» syndy respýblıkalyq sharalardyń aýqymyn keńeıtip, halyqaralyq deńgeıge jetkizý qajettigin atap ótti.
«Joba aıasynda óńirlerden kelgen mádenıet qyzmetkerleri ózara tájirıbe almasyp, sheberlikterin shyńdady. Bul sharalar elimizdiń túpkir-túpkirinen jınalǵan áriptesterimiz úshin múmkindikter alańyna aınalyp, olardyń rýhanı tolysýyna septigin tıgizdi», - deıdi vıtse-mınıstr.
QR Mádenıet jáne sport mınıstrliginiń bastamasymen júzege asyrylǵan «Sálem, Elorda!» óner sherýi bıyl oflaın formatta Almaty oblysy men Almaty qalasyndaǵy óner uıymdarynda ótti.
Festıvaldiń maqsaty – óńirlerdiń óneri men mádenı jetistikterin keńinen nasıhattap, ozyq úlgidegi oryndaýshylardy dáripteý.
Sonymen birge, óner sherýi aıasynda ulttyq qundylyqtar ulyqtalyp, el Táýelsizdiginiń 30 jáne Jambyl Jabaevtyń 175 jyldyǵy sekildi bıyl respýblıkalyq mańyzy bar mereıtoılar men jergilikti ataýly datalardy qamtyldy.
Jobany «Qazaqkontsert» memlekettik kontsert uıymy» janyndaǵy «Respýblıkalyq kontserttik-gastroldik qyzmet ortalyǵy» úılestirýde.
Osy oraıda Qazaqkontsert basshysy Jeńis Seıdýllauly óz sózinde osyndaı iri jobalardy tek úlken qalalarda ǵana emes, óńirlik mádenıet uıymdarynda da ótkizý mańyzdy ekenin aıtty.
«Bıylǵy «Sálem, Elorda!» óner sherýine 20 óńirlik mádenıet uıymy qatysty.
Joba barysynda áriptesterimizge túrli baǵyttaǵy kásibı sheberlik synyptary, tanymdyq máni zor is-sharalar men ozyq úlgidegi kontserttik baǵdarlamalar usynyldy. Óner sherýi aıasynda 22 shara, onyń ishinde 9 master-klass, semınar-trenıngter men praktıkým sabaqtar ótti. Sheberlik synyptarynda mádenıet salasyndaǵy menedjment, mýzykalyq teatrlardaǵy rejıssýranyń ereksheligi, dybys jáne jaryq operatorlarynyń qyzmeti, HR máseleleri syndy taqyryptar qamtyldy. Óner sherýi endi jyl sońynda Táýelsizdiktiń 30 jyldyq mereıtoıyna oraı Nur-Sultan qalasynda ótetin gala-kontsertpen aıaqtalady»,- dep atap ótti Jeńis Seıdýllauly.
«Sálem, Elorda!» ІІ respýblıkalyq óner sherýi estrada juldyzdary men óńir ónerpazdarynyń qatysýymen ótken «Asqaqta, armandardyń Alataýy!» atty gala-kontsertpen aıaqtaldy.
