Salbýryn merekesi: Qusbegilik jáne saıatshylyq óner nasıhattaldy
ShYMKENT. QazAqparat - Ońtústik Qazaqstan oblysynyń Túlkibas aýdanynda saıatshylyq ónerin nasıhattaıtyn etnografııalyq tanymdyq «Salbýryn - mereke ǵoı saıatshyǵa...» sharasy ótti, dep habarlaıdy QazAqparat tilshisi.
Etno-tanymdyq sharanyń ashylýynda sóz alǵan «Alash» halyqaralyq syılyǵynyń laýreaty, belgili jazýshy Marhabat Baıǵut ulttyq salt-dástúrimiz ben ádet-ǵurpymyzdyń urpaq tárbıesi men qoǵamdaǵy máni jaıynda áńgimeledi.
Al óz kezeginde, salt-dástúr ortalyǵynyń dırektory Jánibek Abdanbekuly men belgili saıatshy Muhtar Atahan da atadan balaǵa mura bolǵan dástúrdiń mańyzdylyǵyna toqtaldy.
Shara barysynda búrkit baptaý men qumaı tazylardy ańshylyqqa baýlý, ańǵa salý jaıynda oı-pikirler aıtyldy. Tájirıbe júzinde kórsetildi. Ońtústik óńirine belgili qusbegi Jomart Keýenov pen saıatshy Muhtar Atahan óz kásipteriniń qyr-syry týraly kelýshilerge tyń maǵlumat berip, saıatshylyq dástúr týraly tolǵandyrǵan suraqtaryna jaýap berdi. 
