Salaýatty ómir salty men joǵary utqyrlyq - Qazaqstan jastarynyń trendinde

NUR-SULTAN. QazAqparat - QR Parlamenti Májilisiniń depýtattary, memlekettik organdardyń ókilderi, jetekshi ǵylymı qyzmetkerler, sondaı-aq Qazaqstannyń jastar uıymdary men resýrstyq ortalyqtarynyń basshylary «Qazaqstan jastary-2021» Ulttyq baıandamasynyń jobasy boıynsha saraptamalyq kezdesýge qatysty, dep habarlaıdy QR Aqparat jáne qoǵamdyq damý mınıstrliginiń baspasóz qyzmeti .

Bıylǵy jyldyń ereksheligi - Ulttyq baıandama el Táýelsizdiginiń 30 jyldyǵy aıasynda daıyndaldy, onda Táýelsizdik urpaqtarynyń portreti jasalyp, 10-20-30 jyl aralyǵynda bolǵan jastardyń damý dınamıkasyna salystyrmaly taldaý berilgen. Sapaly taldaý úshin 4 áleýmettik zertteý, sondaı-aq saraptamalyq jáne ǵylymı qoǵamdastyqpen áleýmettik konsýltatsııalar júrgizildi.

Qatysýshylar Qazaqstandaǵy jastardyń qazirgi jaǵdaıyna jan-jaqty taldaý jasalǵan ǵylymı eńbektiń praktıkalyq mańyzdylyǵyn atap ótti. Baıandamanyń ǵylymı avtorlarynyń biri Dana Ashımhanova jastar arasyndaǵy ózekti trendter týraly aıtyp berdi. Atap aıtqanda, búgingi tańda joǵary utqyrlyq, dıdjıtalızatsııa, zamanaýı tehnologııalardy paıdalaný qarqyny jáne salaýatty ómir salty eń tanymal trendterge aınalyp otyr.

Saraptamalyq talqylaý barysynda qatysýshylar qoǵamdyq-saıası júıede óz rólińdi qabyldaý, qalalyq jáne aýyldyq mektepter arasyndaǵy alshaqtyq turǵysynan bilim berýdiń qoljetimdiligi men sapasy, kásipter naryǵyndaǵy úrdister, jastardyń ǵylymdaǵy múmkindikteri men perspektıvalary sııaqty mańyzdy máseleler qozǵaldy.

Memlekettik jastar saıasatyn damytýdyń 30 jyldaǵy hronologııasy mańyzdy bir bólik boldy. Bıylǵy jylda jańa zańnamalyq bastamalardy, jastardy damytý ındeksin engizýdi, jastardy qoldaýdyń 2021-2025 jyldarǵa arnalǵan Keshendi josparyn iske asyrýdy qamtıtyn memlekettik jastar saıasatyn iske asyrýda jańa kezeń bastalǵany atap ótildi.

QR AQDM Jastar jáne otbasy isteri komıtetiniń tóraǵasy Shahmardan Baımanov saraptamalyq kezdesýdiń jumysyn qorytyndylaı kele, qazaqstandyq jastardyń ózekti máselelerin sheshýde memleket pen ǵylymı-sarapshylyq qoǵamdastyqtyń ózara is-qımylynyń mańyzdylyǵyn atap ótti. «Dál osy «Halyq únine qulaq asatyn memleketti« iske asyrý aıasyndaǵy jalpy kúsh-jiger elimizdegi jastar saıasatyn tıimdi damytý isindegi qazirgi zamanǵy syn-qaterlerge der kezinde den qoıýǵa múmkindik beredi», - dedi ol.

Esterińizge sala keteıik, Elbasy Nursultan Nazarbaevtyń bastamasymen «Jastar» ǵylymı-zertteý ortalyǵy 2013 jyldan bastap jyl saıyn «Qazaqstan jastary» Ulttyq baıandamasyn jarııalap keledi. Aǵymdaǵy jyldyń sońyna deıin QR AQDM tapsyrysy boıynsha daıyndalatyn Ulttyq baıandama resmı túrde tanystyrylady jáne kópshilikke ashyq túrde qoljetimdi bolady.