Salaýatty ómir salty áıelderde ınsýlttyń damý qaýpin aıtarlyqtaı báseńdetedi
ASTANA. QazAqparat - ASh-taǵy Karolına ınstıtýtynyń zertteýshileri 31696 áıelden saýalnama aldy. Oǵan qatysýshylardyń ortasha jasy 60-ty qurady. Áıelder tamaqtaný men salaýatty ómir salty týraly 350 suraqtan turatyn saýalnamany toltyrdy. Sodan keıin ǵalymdar qytasýshylardy 10 jyl boıy baqylaǵan, dep habarlady Science World Report.
Zertteýshiler salaýatty ómir saltyn saqtaýdyń 5 tásili - durys tamaqtaný, alkogoldi oryndy tutyný, temekiden bas tartý, fızıkalyq belsendiliktiń joǵary deńgeıi jáne artyq salmaq qospaýdy usyndy. Durys tamaqtanýdyń negizine olar tamaqpen birge jemis-jıdek, kókónister men maısyz sút ónimderin paıdalanýdy tańdady. Alkogoldi oryndy tutyný mejesi retinde aptasyna 3-9 ret ishý belgilendi. Fızıkalyq belsendilik retinde velosıpedpen kúnine 40 mınýt júrip, aptasyna bir saǵat kóleminde energııany shyǵaratyn dene jattyǵýlaryn jasaý qarastyryldy.
Áıelderdiń kóbi 2-3 keńesti ǵana is júzinde ustandy, al beseýin de ustanǵandar - 589 bolsa, bireýin de jasamaǵandar - 1525 bolyp shyqty. Osy zertteýge qatysqandardyń 1554-inde ınsýlt damı bastaǵan. Usynylǵan bes tásildiń bárin ustanǵan áıelderdiń ınsýlt qaýpi ony múlde ustanbaǵandarǵa qaraǵanda 54 paıyzǵa tómen boldy.
