Salaýatty uzaq ómir súrý óneri: Astanada Halyqaralyq ıoga kúni atalyp ótti
ASTANA. KAZINFORM — Elordadaǵy «Astana Arena» sport kesheniniń aýmaǵynda Halyqaralyq ıoga kúni keń kólemde atalyp ótti. Іs-sharaǵa myńǵa jýyq adam qatysty, dep habarlaıdy qala ákimdiginiń resmı saıty.
«Ioga — salaýatty uzaq ómir súrý óneri» uranymen ótken aýqymdy is-sharany Úndistannyń Qazaqstandaǵy elshiligi men Svamı Vıvekananda atyndaǵy mádenı ortalyq (SVCC) uıymdastyrdy.
Svamı Vıvekananda atyndaǵy mádenı ortalyqtyń dırektory Nalını Sınghaldyń aıtýynsha, mundaı sharalar mádenıetaralyq dıalogty nyǵaıtýdyń tıimdi quraly bolyp sanalady.
— Biz stadıonǵa keminde shamamen 1500 adam keler dep kútken edik. Qarańyzshy, jurt qanshalyqty belsendi qatysyp jatyr. Bul — ásirese pandemııadan keıin adamdardyń basyn qosatyn «adamnan adamǵa» qaǵıdatynyń kórinisi. Qazir jurt densaýlyqty saqtaýǵa kóbirek kóńil bólip, tek medıtsınaǵa ǵana senip otyrmaıdy. Ioga adamǵa saýyǵýǵa, densaýlyǵyn jaqsartýǵa kómektesedi jáne bizdiń uranymyzda aıtylǵandaı, belsendi uzaq ómir súrýge áser etedi, — dedi ol.
Astanamen qatar Ioga kúni Qazaqstannyń 20-dan astam qalasynda jergilikti ákimdikterdiń, bilim berý uıymdarynyń, saýyqtyrý ortalyqtarynyń jáne ıoga qaýymdastyqtarynyń qoldaýymen ótip jatyr. Tańǵy baǵdarlama saǵat 05:30–da bastalyp, sanskrıt tilinen aýdarǵanda «Kúnge sálem» degen maǵynany bildiretin 108 ret «Sýrıa Namaskar» jattyǵýyn oryndaýdy qamtydy. Bul keshen deneni sozý men qol qımyldaryna negizdelgen 12 negizgi qalyptan turady.
Qosshy qalasynyń turǵyny Anar Jabaspaeva ıogamen 10 jyldyq úzilisten keıin qaıta shuǵyldana bastaǵanyn jáne stadıonǵa ustazymen birge kelgenin aıtty.
— Ioga — aqyl men denege arnalǵan jattyǵý. Ol adamdy tynyshtandyryp, bosańsytady. Bul — sanany tazartyp, oıdy retteıtin sanaly tájirıbe. Iogamen aınalysýdy endi bastaǵysy keletinder qoryqpaǵany jón. Adam jasynyń esh mańyzy joq, al ıkemdilik tájirıbe arqyly mindetti túrde qalyptasady, — dedi Anar Jabaspaeva.
Merekelik sharalar qyzǵan shaqta Lakshmınaraıana-2026 (LGMF) jahandyq mýzykalyq festıvali ótedi. Bul — álemge áıgili skrıpkashy, doktor Lakshmınaraıana Sýbramanıam negizin qalaǵan halyqaralyq mýzyka festıvalderiniń biri. Festıval aıasynda úndi klassıkalyq mýzykasy, orkestrlik shyǵarmalar jáne fıýjn baǵytyndaǵy álemdik mýzyka oryndalady.
Joba qazaqstandyq ártisterdiń qatysýymen, belgili dırıjer, maestro Abzal Muhıtdın jetekshiligimen ótedi.
Budan buryn Astanada vedomstvoaralyq oqý-jattyǵýǵa baılanysty qozǵalys shekteletinin jazǵanbyz.
