«Salamatty Qazaqstan» jobasy aıasynda Shar stantsııasynyń turǵyndary úshin qaıyrymdylyq kontserti ótedi

ASTANA. QazAqparat – «Salamatty Qazaqstan» medıtsınalyq poıyzy Abaı oblysy Jarma aýdanynyń Shar stantsııasyna keldi. Búgin bul stantsııada estrada juldyzdarynyń qatysýymen kontsert ótedi, dep habarlaıdy QazAqparat tilshisi.

Aıta keteıik, «Salamatty Qazaqstan» áleýmettik jobasy QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen iske asyrylyp jatyr.

«Jibek joly» telearnasy «Salamatty Qazaqstan» áleýmettik jobasyn aqparattyq qoldaý sheńberinde uıymdastyrǵan kontserttik baǵdarlama «Samruk-Kazyna Trust» qorynyń qoldaýymen «Qazaqstan temir joly» UK» AQ Áleýmettik jobalar qorymen yntymaqtastyqta ótedi.

Qaıyrymdylyq kontsertine tanymal ánshiler Tamara Asar men Marjan Arapbaeva qatysady. Keshti belgili jýrnalıst Janserik Beıseev júrgizedi. Sondaı-aq Abaı oblysy Jarma aýdanynyń mádenı ujymy óner kórsetedi.

Turǵyndar ártisterdiń ónerin tamashalap qana qoımaı, «Salamatty Qazaqstan» jobasy aıasynda usynylatyn qoljetimdi qyzmetter týraly aqparat ala alady.

Ásirese, terapevt, stomatolog, oftalmolog, lor, hırýrg, ýrolog, mammolog, pedıatr jáne basqa da biliktiligi joǵary dárigerlerge tegin tekserilý jáne emdelý múmkindigi týraly qajetti málimet alýǵa bolady.

Bıyl QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen alǵash ret azamattardyń memlekettik áleýmettik qoldaý, zeınetaqy, járdemaqy, áleýmettik tólemder jáne ataýly áleýmettik kómek alý quqyǵyn qorǵaý máseleleri boıynsha tegin konsýltatsııalar ótip jatyr. Sonymen qatar shalǵaı aımaqtardyń turǵyndary tegin medıatıvti jáne zańgerlik kómek ala alady.

«Salamatty Qazaqstan» medıtsınalyq poıyzynda ýltradybystyq, flıýorografııalyq apparat, shaǵyn operatsııalyq bólme, zerthanany jáne ınternetke symsyz qol jetkizýge arnalǵan baılanys quraldaryn qosa alǵanda, zamanaýı dıagnostıkalyq jáne emdik jabdyqtar bar.

Qaıyrymdylyq kontserti Shar stantsııasynyń temirjol vokzalynda saǵat 18:00-de bastalady. Bul merekeni «Jibek joly» telearnasy da kórsetedi.

Eske sala keteıik, 2023 jyldyń 26 sáýirinde Almaty-2 stantsııasynan shyqqan «Salamatty Qazaqstan» medıtsınalyq poıyzy 6 jeltoqsanǵa deıin Qazaqstannyń 17 oblysyndaǵy 121 stantsııaǵa barady.

Medıtsınalyq poıyzdyń qozǵalys kestesi shalǵaıdaǵy stantsııalarda medıtsınalyq pýnktterdiń joqtyǵyn eskere otyryp jáne azamattar men memlekettik organdardyń ótinishteri negizinde jasalǵan.

«Salamatty Qazaqstan» áleýmettik jobasynyń basty aqparattyq seriktesi – Qazaqstan Respýblıkasy Prezıdentiniń teleradıokesheni.