«Salamatty Qazaqstan» poıyzynyń dárigerleri Arqalyq turǵynyn aýrýhanaǵa shuǵyl jatqyzdy

ASTANA. QazAqparat – «Salamatty Qazaqstan» medıtsınalyq poıyzynyń dárigerleri shalǵaıdaǵy stantsııa turǵyndaryna sapaly medıtsınalyq, zańgerlik jáne medıatıvtik kómek kórsetýdi jalǵastyryp keledi. Jaqynda olar Qostanaı oblysynyń Arqalyq stantsııasynda boldy jáne naýqas densaýlyǵyna tóngen qaýiptiń aldyn aldy, dep habarlaıdy QazAqparat.

26 sáýir men 17 shilde kúnderi «Salamatty Qazaqstan» medıtsınalyq poıyzynyń mamandary Almaty, Pavlodar, Aqmola, Soltústik Qazaqstan, Shyǵys Qazaqstan, Qostanaı oblystarynyń, sondaı-aq Ulytaý, Jetisý jáne Abaı oblystarynyń 47 stantsııasyna baryp, turǵyndarǵa kásibı medıtsınalyq, zańgerlik jáne medıatıvtik kómek kórsetti.

Jaqynda ǵana dárigerler Qostanaı oblysynyń Arqalyq stantsııasyndaǵy jumysyn aıaqtady. Onda dárigerler naýqastyń terisinde irińdi-qabyný oshaqtary baryn anyqtady jáne dereý jedel járdem shaqyryp, naýqasty aýrýhanaǵa jatqyzdy.

«Ol birneshe ret aýrýhanaǵa barǵan, biraq durys dıagnoz qoıylmaǵan jáne aýrýyn asqyndyryp alǵan. Onyń denesinde irińdi-qabyný zaqymynyń keń taralǵanyn baıqadyq. Naýqas qazir aýrýhanada emdelip jatyr. Eger ol bizge júginbegende jáne ári qaraı júre bergende, teriniń juqpaly ınfektsııasy - sepsıs bastalýy múmkin edi», - dedi «Salamatty Qazaqstan» medıtsınalyq poıyzynyń bas dárigeri Aınur Eginbaeva.

Jergilikti turǵyndardyń aıtýynsha, naýqas halyqtyń áleýmettik osal toptaryna arnalǵan jataqhanada turady. Bul jataqhananyń kóptegen turǵynynda teri aýrýlary bar. Medıtsınalyq poıyzdyń dárigerleri jergilikti dárigerler men ákimdik ókilderine júginip, sonda turatyn barlyq adamdy medıtsınalyq tekserýden ótkizýdi surady.

«Bul jóninde dabyl qaǵý kerek. Olar bir-birine teri aýrýyn juqtyrýy múmkin. Barlyq turǵyndardy tekserý kerek. Sol kúni bizge taǵy bir er adam keldi, onyń terisinde de osyndaı jaralar bar ekeni anyqtaldy», - dep tolyqtyrdy dáriger.

Eske sala ketsek, «Salamatty Qazaqstan» medıtsınalyq poıyzy» áleýmettik jobasyn «Samruk-Kazyna Trust» áleýmettik jobalardy damytý qory QR Prezıdenti janyndaǵy áıelder isteri jáne otbasylyq-demografııalyq saıasat jónindegi ulttyq komıssııanyń jáne Densaýlyq saqtaý mınıstrliginiń qatysýymen, «Áleýmettik jobalar qory» korporatıvtik qorymen yntymaqtastyqta júzege asyryp otyr.

«Salamatty Qazaqstan» áleýmettik jobasynyń basty aqparattyq seriktesi – QR Prezıdentiniń teleradıokesheni.