«Salamatty Qazaqstan» poıyzy Qaraǵandy oblysynyń Kóktińkóli stansasyna barady

ASTANA. QazAqparat – Qaraǵandy oblysy Shet aýdanynyń turǵyndaryna joǵary bilikti medıtsınalyq kómek qoljetimdi bolady. «Salamatty Qazaqstan» medıtsınalyq poıyzy Kóktińkóli stansasyna aıaldaıdy, dep habarlaıdy QazAqparat tilshisi.

«Salamatty Qazaqstan» medıtsınalyq poıyzy» áleýmettik jobasyn «Samruk-Kazyna Trust» áleýmettik jobalardy damytý qory QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń jáne Densaýlyq saqtaý mınıstrliginiń qatysýymen, «Áleýmettik jobalar qory» korporatıvtik qorymen yntymaqtastyqta júzege asyryp otyr.

«Salamatty Qazaqstan» áleýmettik jobasynyń basty aqparattyq seriktesi – QR Prezıdentiniń teleradıokesheni.

Bıyl Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen alǵash ret azamattardyń memlekettik áleýmettik qoldaý, zeınetaqy, járdemaqy, áleýmettik tólemder jáne ataýly áleýmettik kómek alý quqyǵyn qorǵaý máselesi boıynsha tegin konsýltatsııa berilip keledi.

Medıtsınalyq poıyz 5 tamyz kúni saǵat 02:01-de Kóktińkóli stansasyna keledi.

Kelesi 6 tamyz kúni 23:45-te jolǵa attanyp ketedi.

Medıtsınalyq poıyzdyń baǵyty medıtsınalyq kabıneti joq aımaqtardy qamtıdy.

Osylaısha, bıyl shalǵaıdaǵy eldi meken turǵyndary terapevt, stomatolog, oftalmolog, hırýrg, ýrolog, mammolog, pedıatr jáne basqa da salalar boıynsha tegin tekserýden ótip, emdelýge múmkindik aldy.

Poıyz zamanaýı dıagnostıkalyq jáne emdik jabdyqtarmen, ýltradybystyq, flıýorografııalyq apparatpen, shaǵyn operatsııalyq bólmemen, zerthanamen jabdyqtalǵan. Odan bólek, symsyz ınternet baılanys quraldarymen qamtylǵan.

«Salamatty Qazaqstan» medıtsınalyq poıyzynyń mamandary 26 sáýir men 17 shilde aralyǵynda Almaty, Pavlodar, Aqmola, Soltústik Qazaqstan, Shyǵys Qazaqstan, Qostanaı, Ulytaý, Jetisý jáne Abaı oblystarynyń 47 stansasynda turǵyndarǵa kásibı medıtsınalyq, zańgerlik jáne medıatıvti kómek kórsetip úlgerdi.

Aıta keteıik, 26 sáýirde Almaty-2 stansasynan bastalǵan «Salamatty Qazaqstan» medıtsınalyq poıyzy 6 jeltoqsanǵa deıin júredi.

Poıyzdyń júrý kestesin «QTJ – Júk tasymaly» JShS bekitken.

Medıtsınalyq poıyzdyń qazirgi kestesi medıtsına pýnkteri joq shalǵaı stansalardy, azamattar men memlekettik organdardyń suranysyn eskere otyryp jasaldy.