«Salamatty Qazaqstan» poıyzy: Bilikti dárigerler Shelek aýyly turǵyndaryna qyzmet kórsetti

ASTANA. QazAqparat – «Salamatty Qazaqstan» poıyzynyń mamandary Almaty oblysynyń Shelek aýyly turǵyndaryna medıtsınalyq qyzmet kórsetti, dep habarlaıdy QazAqparat tilshisi.

Jibek Joly telearnasynyń málimetinshe, «Salamatty Qazaqstan» poıyzynyń úshinshi kelip toqtaǵan núktesi Almaty qalasynan 120 shaqyrym jerde ornalasqan Shelek stansasy boldy. Stansada poıyz dárigerleri aýyl turǵyndaryn kúni boıy qabyldady.

«ÝZI-ǵa túsip, kóz dárigeriniń, nevropatolgtyń jáne basqa da mamandardyń qabyldaýynda boldy. Mamandardyń qyzmet kórsetýine rıza boldym», - deıdi Jibek Joly telearnasynyń tilshisine suhbat bergen stansa turǵyndarynyń biri.

Nevropatolog Nurlan Serikbaıuly eldi meken turǵyndarynyń 80-90 paıyzy omyrtqa aýrýlarymen keletindigin aıtady. Al genokolog Ásel Buqanbaı keıbir aýyl kelinshekteriniń óziniń júkti ekendigin bilmeı beıqam júretindigin atap ótedi.

«Olar der ýaqytynda tekserilmegendikten qandaı aýrýy bar ekendigin de bilmeıdi», - dedi ol.

Esterińizge sala keteıik, 26 sáýir kúni «Almaty-2» temirjol vokzalynan «Salamatty «Qazaqstan» poıyzy» saltanatty túrde jolǵa shyqty.

«Medıtsınalyq poıyz» jobasynyń basty maqsaty - elimizdiń shalǵaı aýdandarynyń turǵyndaryna tegin medıtsınalyq kómek kórsetý.

Jobany «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń jáne Densaýlyq saqtaý mınıstrliginiń qatysýymen, «Qazaqstan temir joly» UK» AQ janyndaǵy «Áleýmettik jobalar qory» korporatıvtik qorymen jáne aqparattyq seriktes - Jibek Joly telearnasymen birge júzege asyrady.

Dárigerler brıgadasy halyqqa barlyq qyzmetti tegin kórsetedi.

Poıyzda bıohımııalyq taldaýlar jasap, ishki aǵzalardy ýltradybystyq zertteýden ótkizýge múmkindik jasalǵan.