«Salamatty Qazaqstan» poıyzy Atyraý turǵyndaryna medıtsınalyq kómek kórsetip jatyr

ATYRAÝ. QazAqparat – «Salamatty Qazaqstan» poıyzy Atyraý turǵyndaryna medıtsınalyq kómek berýdi jalǵastyryp jatyr, dep habarlaıdy QazAqparat tilshisi.

«Salamatty Qazaqstan» poıyzynyń bas dárigeri Aınur Igınbaevanyń aıtýynsha, poıyzdyń quramynda 8 vagon bar. Arnaıy jobanyń basty aqparattyq seriktesi – QR Prezıdentiniń teleradıo kesheni.

Isataı aýdanyndaǵy Isataı stansasyna 5 qyrkúıekte kelgen. Sodan beri munda turǵyndarǵa tegin medıtsınalyq kómek, psıhologııalyq, quqyqtyq jáne medıatıvtik keńes berilip jatyr. Aýyl turǵyndary terapevt, stomatolog, oftalmolog, lor, hırýrg, ýrolog, nevropatolog, gınekolog sekildi bilikti dárigerlerdiń keńesin alyp, tegin tekserýge júgingen.

«Bul áleýmettik joba bolǵandyqtan, turǵyndarǵa tegin qyzmet kórsetedi. «Salamatty Qazaqstan» poıyzy 26 sáýirde Almaty-2 stansasynan jolǵa shyqqan edi. Osy kezge deıin Almaty, Jetisý, Abaı, Ulytaý, Qaraǵandy, Qostanaı, Aqmola jáne Mańǵystaý oblystarynda qabyldaý júrgizdik. Jobamyz 6 jeltoqsanǵa deıin óz jalǵasyn tabady. Medıtsınalyq poıyzda bıohımııalyq taldaýlar, flıýrografııa, ishki aǵzalar men tamyrlardyń ÝDZ, elektrokardıogramma jáne dıagnostıkalyq zertteýlerdiń basqa da túrlerin júrgizýge múmkindik qarastyrylǵan. Bizdiń quramdaǵy tájirıbeli mamandar turǵyndardyń kez-kelgen saýalyna kásibı turǵydan tolyq keńes bere alady. Dárigerler tekserýinen ótken turǵyndarǵa qorytyndysy sol sátte qolyna berilip jatyr», -Aınur Igınbaeva.

Jyljymaly medıtsınanyń dárigerine júgingen turǵyndardyń qatarynda Álip Qaıtaqpaev ta bar. Ol dárigerlerge áıelimen birge kelgen.

«Biz shalǵaı aýylda turamyz. Qaladaǵy dárigerlerge barý úshin jol kiresine qarjy qajet. Biraq, densaýlyqty oılap, alańdap júremiz. Mine, «Salamatty Qazaqstan» medıtsınalyq poıyzynyń shalǵaı aýylǵa kelip, áıelim ekeýmiz dárigerlerdiń keńesin aldyq. Bul – biz úshin úlken qoldaý», -Álip Qaıtaqpaev.

«Salamatty Qazaqstan» poıyzy búgin, 7 qyrkúıekte jergilikti ýaqytpen saǵat 21:43-te Naryn stansasyna keledi. Munda eki kún – qyrkúıek saǵat 20:59-ge deıin aıaldaıdy.

Eske sala ketelik, buǵan deıin «Salamatty Qazaqstan» poıyzynyń dárigerleri Atyraý turǵyndaryna medıtsınalyq kómek berip jatqanyn jazǵan edik.

https://kaz.inform.kz/news/salamatty-kazakstan-poyyzynyn-darigerleri-atyrau-turgyndaryna-medicinalyk-komek-berip-zhatyr_a4108074