«Salamatty Qazaqstan» memlekettik baǵdarlamasyn júzege asyrýdyń arqasynda ómir súrý uzaqtyǵy 68,4 jasqa jetti
ASTANA. 29 jeltoqsan. QazAqparat - «Densaýlyq saqtaý mınıstri Salıdat Qaıyrbekova 2011 jyldyń 11 aıyndaǵy elimizdiń áleýmettik-ekonomıkalyq damýy jáne memlekettik bıýdjettiń oryndalý barysyna arnalǵan Úkimet otyrysynda
«Salamatty Qazaqstan» memlekettik baǵdarlamasynyń aǵymdaǵy jylǵy aldyn ala qorytyndylarymen tanystyrdy», dep habarlaıdy Densaýlyq saqtaý mınıstrliginiń baspasóz qyzmeti.
Baspasóz málimetterine qaraǵanda, jalpy respýblıkada barlyq negizgi medıtsınalyq-demografııalyq kórsetkishter boıynsha oń ózgerister baıqalady. 2011 jyldyń 10 aıynda bala týý kórsetkishi 0,4 paıyzǵa artyp, ólim-jitim 1,8 paıyzǵa tómendep, tabıǵı ósim 1,7 paıyzdy qurady. «Salamatty Qazaqstan» memlekettik baǵdarlamasynyń is-sharalaryn júzege asyrý arqasynda ómir súrý uzaqtyǵy 68,4 jasqa jetti.
Aǵymdaǵy jyly ana men bala densaýlyǵyn qorǵaý basym baǵyt retinde anyqtaldy. Elimizde áıelder men balalardy profılaktıkalyq tekserý, ımmýnoprofılaktıka júıeli negizde júrgizilýde. Atqarylǵan is-sharalar ana men bala ólim-jitimin turaqty túrde tómendetýge múmkindik berdi. Ana ólim-jitimi kórsetkishi 1,4 ese, bala ólim-jitimi 1,1 ese tómendedi. Jalpy bul kórsetkish boıynsha elimizdiń barlyq óńirinde tómendeý úrdisi baıqalady.
Tıimdi kardıologııalyq jáne kardıohırýrgııalyq qyzmetter qurý nátıjesinde qan aınalymy júıesi aýrýlary 5 paıyzǵa jýyq tómendep, osy aýrýlardan bolatyn ólim-jitim kórsetkishi 20 paıyzǵa azaıdy.
2011 jyldyń 11 aıynda turǵyndardyń týberkýlezben aýyrý kórsetkishi 10 paıyzǵa týberkýlezden bolatyn ólim-jitim 21 paıyzǵa tómendedi.
Onkologııalyq kómekti jaqsartý sheńberinde maqsatty toptarǵa profılaktıkalyq tekserýler júrgizý arqyly qaterli isik aýrýlaryn erte anyqtaýǵa jáne dıagnostıkalaý men emdeýdiń progressıvtik ádistemelerin qoldanýǵa basymdyq berilýde. Nátıjesinde ótken jyldyń sáıkes kezeńimen salystyrǵanda qaterli isik aýrýlaryn anyqtaý 1,2 paıyzǵa jaqsaryp, ólim-jitim 6,5 paıyzǵa tómendedi. Jalpy, aǵymdaǵy jyly salanyń aldyna qoıylǵan barlyq mindetter, sondaı-aq Úkimet pen Densaýlyq saqtaý mınıstrligi arasynda 2011 jylǵa arnalǵan Memorandýmda kórsetilgen maqsattyq ındıkatorlarǵa jetýdegi barlyq mindettemeler oryndaldy. Aldaǵy jyly barlyq baǵyttar boıynsha júıeli jumystar jalǵasatyn bolady.
