«Salamatty Qazaqstan» medpoıyzy Tıshınskaıa stansasyna aıaldaıdy

ASTANA. QazAqparat – Erteń, 27 mamyr kúni «Salamatty Qazaqstan» medıtsınalyq poıyzy Tıshınskaıa stansasyna jetedi. Stansa turǵyndaryna joǵary bilikti medıtsınalyq kómek kórsetiletin bolady, dep habarlaıdy QazAqparat tilshisi.

Medıtsınalyq poıyz Tıshınskaıa stansasyna tańerteń 09:11-de jetedi. Al bir kúnnen keıin, 28 mamyr kúni saǵat 18:00-de qaıta jolǵa shyǵady.

Poıyz baǵdary medıtsınalyq kabınetteri joq óńirlerdi qamtıdy.

Demek, bıyl shalǵaı stansalardyń turǵyndary tegin tekserýden ótip, terapevt, stomatolog, oftalmolog, lor, hırýrg, ýrolog, mammolog, pedıatr syndy biliktiligi joǵary mamandardan em alady. Poıyz zamanaýı dıagnostıkalyq jáne emdeý jabdyqtarymen, ÝDZ-men, flıýorografııalyq apparatpen, shaǵyn ota zerthanasymen, ınternetke symsyz qosylýǵa múmkindik beretin baılanys quralymen jabdyqtalǵan.

Buǵan deıin, 2023 jylǵy 10-22 mamyr aralyǵynda «Salamatty Qazaqstan» medıtsınalyq poıyzy Jetisý oblysynyń alty shalǵaı beketin júrip ótken bolatyn.

Densaýlyq kerýeni qyzmetkerleri Kóksý, Qalpe, Lepsi, Aqtoǵaı, Beskól jáne Dostyq stansalarynyń turǵyndaryn qarady.

Medıtsınalyq poıyz Jetisý oblysynan keıin Shyǵys Qazaqstan oblysy boıynsha týrǵa attandy. Dárigerler Jarma, Ertis zaýyty stansalarynyń turǵyndaryna medıtsınalyq kómek kórsetti.

Aıta keteıik, 26 sáýirde Almaty-2 stantsııasynan bastalǵan «Salamatty Qazaqstan» medıtsınalyq poıyzy 6 jeltoqsanǵa deıin júredi.

Esterińizge sala keteıik, jobany «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, Densaýlyq saqtaý mınıstrliginiń qatysýymen, «Áleýmettik jobalar qory» korporatıvtik qorymen jáne aqparattyq seriktes - Jibek Joly telearnasymen birlesip júzege asyrýda.

Medıtsınalyq poıyzdyń qazirgi qozǵalys kestesi shalǵaıdaǵy stantsııalarda medıtsınalyq pýnktter joqtyǵyn eskere otyryp jáne azamattar men memlekettik organdardyń ótinishteri negizinde jasalǵan.