«Salamatty Qazaqstan» medıtsınalyq poıyzy jolǵa shyqty
Medıtsınalyq poıyz Jetisý oblysyna baryp, shalǵaı stantsııalar men razezderde turǵyndarǵa qyzmet kórsetedi.
Poıyz 20 maýsym men 2 qarasha aralyǵynda elimizdiń 67 shalǵaı stantsııasyna barady. Marshrýt kelesi oblys aýmaqtary arqyly ótedi: Almaty, Shyǵys Qazaqstan, Pavlodar, Soltústik Qazaqstan, Aqmola, Qostanaı jáne Qaraǵandy oblystary, sondaı-aq úsh jańa óńir – Jetisý, Abaı jáne Ulytaý.
«Salamatty Qazaqstan» poıyzy japon jáne nemis óndirisiniń medıtsınalyq jabdyqtarymen qamtylǵan: qajet bolǵan jaǵdaıda keńeıtilgen jalpy jáne bıohımııalyq taldaýlardy, rentgenografııa men flıýrografııany, ishki aǵzalar men tamyrlardyń ÝDZ-zertteýlerin, elektrokardıogramma jáne gastrofıbroskopııany, dıagnostıkalyq zertteýlerdiń ózge de túrlerin jasaýǵa múmkindik bar. Sonymen qatar bıyl stamotologııalyq qurylǵylar da jańartylǵan», – dedi «Salamatty Qazaqstan» poıyzynyń aǵa dárigeri Arman Isaınov.
Mamandandyrylǵan medıtsınalyq poıyz 8 vagonnan turady: dızel-generator vagony, 4 medıtsınalyq vagon, 1 konferents-zal jáne meıramhana, 2 kýpe vagon. Dızel-generator vagony qajet bolǵan jaǵdaıda tótenshe jaǵdaı kezinde shaǵyn eldi mekendi elektr energııasymen qamtamasyz ete alady.
Poıyzdar respýblıkanyń jetekshi klınıkalarymen telemedıtsınalyq konsýltatsııalar júrgizý úshin telefon baılanysymen, ınternet jelisimen jabdyqtalǵan.
Medıtsınalyq personal bilikti mamandardan quralǵan: terapevt, pedıatr, kardıolog, nevropatolog, okýlıst, LOR, gınekolog, hırýrg, ýrolog, mammolog, stomatolog, rentgenolog, kardıolog, ÝDZ dárigeri, endoskopıst, fýnktsıonaldyq dıagnostıka dárigeri. Bıyl medıtsına mamandarynyń quramyna psıholog jáne dermatovenerolog qosyldy, jobaǵa barlyǵy 36 maman qatysady. Dárigerler brıgadasy halyqqa barlyq qyzmetti tegin kórsetedi.
Joba «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qorynyń qarjylaı qoldaýymen, QR Densaýlyq saqtaý mınıstrliginiń qatysýymen, «Qazaqstan temir joly» UK AQ janyndaǵy «Áleýmettik jobalar qory» korporatıvtik qorymen birlesip iske asyrylýda.
Aıta keteıik, «Salamatty Qazaqstan» – joba boıynsha ekinshi poıyz. Sebebi, 23 mamyrdan bastap «Járdem» medıtsınalyq poıyzy shalǵaı aýdandarda tegin medıtsınalyq kómek kórsete bastady.
