«Salamatty Qazaqstan» medıtsınalyq poıyzy búgin Prııshımka stansasyna keledi

ASTANA. QazAqparat – Qostanaı oblysynyń turǵyndaryna biliktiligi joǵary dárigerlerdiń kómegi qoljetimdi bolady. Prııshımka beketine «Salamatty Qazaqstan» medıtsınalyq poıyzy keledi, dep habarlaıdy QazAqparat tilshisi.

«Salamatty Qazaqstan» medıtsınalyq poıyzy» áleýmettik jobasyn «Samruk-Kazyna Trust» áleýmettik jobalardy damytý qory QR Prezıdenti janyndaǵy áıelder isteri jáne otbasylyq-demografııalyq saıasat jónindegi ulttyq komıssııanyń jáne Densaýlyq saqtaý mınıstrliginiń qatysýymen, «Áleýmettik jobalar qory» korporatıvtik qorymen yntymaqtastyqta júzege asyryp otyr.

Bıyl Qazaqstan Respýblıkasy Prezıdentiniń janyndaǵy áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen alǵash ret azamattardyń memlekettik áleýmettik qoldaý, zeınetaqy, járdemaqy, áleýmettik tólemder jáne ataýly áleýmettik kómek alý quqyǵyn qorǵaý máselesi boıynsha tegin konsýltatsııa berilip keledi.

Sonymen qatar, shalǵaı aımaq turǵyndary tegin medıatıvti jáne zańgerlik kómek ala alady.

Medıtsınalyq poıyz Prııshımka stantsııasyna búgin 19:44-te jetedi. 20 shilde keshki 19:50-ge deıin turyp, saparyn jalǵastyrady.

Medıtsınalyq poıyzdyń baǵyty medıtsınalyq kabınetteri joq aımaqtardy qamtıdy.

Osylaısha, bıyl shalǵaıdaǵy eldi meken turǵyndary terapevt, stomatolog, oftalmolog, hırýrg, ýrolog, mammolog, pedıatr jáne basqa da salalar boıynsha tegin tekserýden ótip, emdelýge múmkindik aldy.

Poıyz zamanaýı dıagnostıkalyq jáne emdik jabdyqtarmen, ýltradybystyq, flıýorografııalyq apparatpen, shaǵyn operatsııalyq bólmemen, zerthanamen jabdyqtalǵan. Odan bólek, symsyz ınternet baılanys quraldarymen qamtylǵan.

Buǵan deıin medıtsınalyq poıyz Jetisý oblysynda bolǵan edi.

Dárigerler Kóksý, Qalpe, Lepsi, Aqtoǵaı, Beskól stantsııalarynyń turǵyndaryna joǵary bilikti medıtsınalyq kómek kórsetti. Oblys boıynsha medıtsınalyq týr Dostyq stantsııasynda aıaqtaldy.

Jetisý oblysynan keıin medıtsınalyq poıyz Shyǵys Qazaqstan oblysyna baǵyt aldy.

Dárigerler Jarma, Ertis zaýyty, Tıshınskaıa, Ermakov, Taýsamaly, Altaı, Kúmistaý, Shar, Belaǵash jáne Sýyqbulaq stantsııalarynyń turǵyndaryna medıtsınalyq kómek kórsetti.

Aıta keteıik, 26 sáýirde Almaty-2 stantsııasynan bastalǵan «Salamatty Qazaqstan» medıtsınalyq poıyzy 6 jeltoqsanǵa deıin júredi.

Medıtsınalyq poıyzdyń qazirgi kestesi medıtsına pýnktteri joq shalǵaı stantsııalardy, azamattar men memlekettik organdardyń suranysyn eskere otyryp jasaldy.