«Salamatty Qazaqstan» baǵdarlamasy Úkimet qoldaýyna ıe boldy» - respýblıkalyq basylymdarǵa sholý

***

«Salamatty Qazaqstan» baǵdarlamasy Úkimet qoldaýyna ıe boldy». Osy taqyryppen «Egemen Qazaqstan» gazetiniń búgingi nómirinde jaryq kórgen maqalaǵa Premer-Mınıstr Kárim Másimovtiń tóraǵalyǵymen ótken keshegi Úkimet otyrysy arqaý bolǵan. Alqaly jıyn barysynda elimizdegi densaýlyq saqtaý isin damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasynyń jobasy qaralǵan edi. Osy másele jóninde baıandama jasaǵan Densaýlyq saqtaý mınıstri Jaqsylyq Dosqalıevtiń aıtýynsha, sala boıynsha osy ýaqytqa deıin jumys istep kelgen 2005-2010 jyldarǵa arnalǵan memlekettik baǵdarlama óziniń aıaqtalý satysynda tur. Ol boıynsha elimizde birqatar jumystar júzege asty. Dári-dármekterdi jetkizýdiń biryńǵaı dıstrıbıýterlik júıesi quryldy. Medıtsınalyq-sanıtarlyq alǵashqy kómekti berý isi basymdyqpen damytyldy. Elimizde 59 medıtsınalyq bilim nysany salyndy. Endi qabyldanyp otyrǵan jańa baǵdarlamada densaýlyq saqtaý isin tıimdi uıymdastyrý máselelerine, sonyń ishinde aýrýlardyń aldyn alý men salamatty ómir saltyn qalyptastyrý jónindegi is-sharalarǵa aıryqsha nazar aýdarylǵan. Baǵdarlama alty baǵytty qamtyp otyr. Atalǵan baǵyttar jaıynda keńirek bilgińiz kelse, basylymnyń seısenbilik nómirin jiberip almańyz.

Keshe Premer-Mınıstrdiń birinshi orynbasary Ómirzaq Shókeevtiń tóraǵalyǵymen Úkimette selektorlyq keńes bolyp ótti. Onda elimizdiń óńirlerinde órtke qarsy kúres sharalary jáne bıylǵy keıbir óńirlerdegi qurǵaqshylyq jaǵdaıyna baılanysty nan baǵasyn turaqtandyrý máseleleri qaraldy. Osyǵan oraı «Egemen Qazaqstan» gazetiniń seısenbilik sanynda «Ormandy qasaqana órteýshiler bar» degen taqyryppen maqala jaryq kórdi. Atalǵan jarııalanymda basylym «Aýyl sharýashylyǵy mınıstrliginiń jaýapty hatshysy Evgenıı Amannyń málimdeýinshe, bıylǵy jylǵy aýa raıynyń jaǵdaıyna baılanysty eginniń pisýi ádettegiden 10-15 kún buryn boldy. Soǵan baılanysty elimizde egin oraǵy erte bastalǵan. Qazirgi ahýal boıynsha, elimizdiń negizgi astyqty aımaqtarynda qýanshylyqqa qaramastan birshama táýir astyq jınalýda. Osyǵan baılanysty elimizdiń ishki qajettigin tolyq qamtamasyz etýge jáne eksporttyq áleýetin saqtaýǵa jetetin astyq jınalady. Endeshe, barlyq óńirlerde nan baǵasynyń qymbattaýyna eshbir negiz joq. Qazir memlekettik qorda 1 mıllıon tonnadan artyq astyq saqtalǵan. Azyq-túlik kelisim-shart korporatsııasy taǵy da 2 mıllıon tonna astyq satyp alý jóninde shart jasasty. Elimizdiń ishki qajetin óteý úshin barlyǵy 3 mıllıon 400 myń tonna astyq qajet. Qurǵaqshylyqqa ushyraǵan batys óńirlerdiń ákimdikteri astyqty aımaqtyń ókilderimen memorandým jasasyp, ózderine qajetti un qoryn jasaýǵa tıis», dep jazady.

***

«Almatyda aq qan aýrýyna shaldyqqan balalardyń jappaı S gepatıtin juqtyrýynyń aıqyn sebepteri tabylmady. Al keshe ǵana tekserý qorytyndysyn alǵan oblystyq sanıtarlyq-epıdemıologııalyq qadaǵalaý departamentiniń mamandary Atyraý aýrýhanasynan em alýshylardyń gepatıt juqtyrý múmkindiginiń joǵary ekenin aıtyp otyr», dep jazady «Aıqyn» gazeti «Atyraýlyq dárigerler gepatıttiń «qurbany» bolyp jatyr» degen taqyryppen jaryq kórgen maqalasynda. Basylymnyń oblystyq sanıtarlyq-epıdemıologııalyq qadaǵalaý departamenti dızınfektsııa jáne aýrýhana ishilik juqpalylardy qadaǵalaý bóliminiń bastyǵy Janar Dosymbaevanyń sózine silteme jasap habarlaýynsha, oblys boıynsha myń jarymnan asa medıtsına qyzmetkeri tekserilip, «IFA»-(ımmýndy fermenttik saraptama) 35 dáriger mamannyń ishinen 17-ciniń «V» jáne «S» vırýsty gepatıtin tasymaldaýshy ekeni anyqtalǵan. Bul esh kúmánsiz naqty derek.

Osy basylymnyń dástúrli «Aq sóıle!» aıdarynyń búgingi qonaǵy - Ońtústik Qazaqstan obylsynyń ákimi Asqar Myrzahmetov. Basylym tilshisiniń barlyq saýaldaryna tuşymdy jaýap bergen ákim suhbaty «Ońtústik Qazaqstanda óndiriletin barlyq shıkizattyń 70 paıyzǵa jýyǵyn ózimizde óńdeıtin bolamyz» degen taqyryppen berilgen. Ekeýara áńgime barysynda ol «Jumysy búgingi kúnniń talap deńgeıinen tómen bolyp shyqqan ákimderdi aýystyryp jatyrmyz. Ýaqyt qymbat. Ákimder ınstıtýty balabaqsha emes. Olarǵa qalaı jumys isteý kerektigin úıretýge ýaqyt joǵalta almaımyz. Prezıdentimiz, ult kóshbasshysy alǵa qoıǵan mindetterdi oryndaýdy kesheýildetýge bolmaıdy», depti.

***

«Aınalasy bes-alty jyldyń ishinde eki ret saıası daǵdarysqa ushyrap, ekonomıkasy toqyraǵan qyrǵyz eli qazaq halqynyń kómegine zárý. Qyrǵyzstannyń qarjy mınıstri Chorobek Imashev baýyrlas qazaq memlekettinen kómek surap otyr. Osyǵan baılanysty keshe Úkimet úıinde qyrǵyz Úkimeti ókilderiniń qatysýymen kórshige kómek berý jóninde arnaıy keńes ótti», dep jazady «Alash aınasy» gazeti. Otyrysta QR Premer-Mınıstri K.Másimov Qyrǵyzstannyń daǵdarystan shyǵýǵa arnalǵan josparymen tanysyp shyǵyp, soǵan sáıkes, Úkimet kórshi elge 21 mıllıon dollar shamasynda kómek qolyn sozýǵa nıet bildirgen. Onyń jartysy gýmanıtarlyq kómek retinde berilip te jatyr. Máselen, qazirgi ýaqytta Qyrǵyzstanǵa 184 tonna metall shatyr, 128 tonna qaraqumyq jarmasy, 1 myń 800 tonna kúrish jóneltilgen. Qıraǵan úılerdi qaıta qalpyna keltirý úshin ondaǵy qurylysqa 900 tonna armatýra jóneltýge ázir otyrǵan qazaq Úkimeti kúzgi astyqty jınaýǵa qosymsha janarmaı, qysqy otyn retinde kómir jiberýge de ýáde berdi.

Almaty telearnasy bıylǵy naýryz aıynan beri qazaq kórermeni úshin óte ıgi sharany qolǵa alyp, «Qazaqfılmniń» ózi óz bolǵaly túsirgen búkil kórkem fılmderin, derekti týyndylary men mýltfılmderin ret-retimen, arna efırinen kún saıyn turaqty túrde bere bastady. Osyǵan oraı «Alash aınasy» gazetiniń tilshisi atalǵan arnanyń bas dırektorynyń orynbasary Serik Ábikenulymen suhbattasyp, barlyq saýaldaryna egjeı-tegjeıli jaýap alǵan. Suhbat barysynda S.Ábikenuly «Qazaqfılm» qymbat suraıdy, fılmderin alý qıyn» degen áńgimelerdiń barlyǵyn óz basym: «Qazaqsha kınony kórsetpeıik» degen nıetten týǵan áreket dep esepteımin. Áıtpese, mysaly, reseılik serıaldardyń bir serııasy - 270-300 dollar da, al «Qazaqfılmniń» bir mýltfılmi 7 myń teńgeden bastap, 100 dollarǵa deıin ǵana turady. Alaıda serıaldyń bir serııasyna bola sonshama aqsha aıamaı shashqandar, ulttyq ónimderimizge kelgende joq jerden taryla qalady. Sondyqtan da «Qazaqfılmniń» qorynda kórsetetin kıno joq, qymbat suraıdy» degenderdiki jáı syltaý dep bilemin», depti.

***

«Kazahstanskaıa prava» gazetiniń QR Prezıdentiniń baspasóz qyzmetine silteme jasap habarlaýynsha, keshe Aqordada Memleket basshysy Nursultan Nazarbaev Astanada EQYU Sammıtin ótkizýge daıyndyq máseleleri jóninde jumys keńesin ótkizdi. «Bıylǵy jylǵy tamyzdyń 3-inde EQYU-ǵa múshe memleketterdiń Syrtqy ister mınıstrleri keńesi Astanada 2010 jylǵy jeltoqsannyń 1­­-2-si kúnderi osy iri halyqaralyq uıymnyń Sammıtin ótkizý týraly naqty sheshim qabyldady. Bul búkil postkeńestik keńistik deńgeıinde alǵashqy iri aýqymdy shara bolyp tabylady. Elimizge 55 memlekettiń basshylary, 65 halyqaralyq uıymnyń delegatsııalary, baspasóz ókilderi - barlyǵy birneshe myń qonaq keledi», dep jazady basylym. Keńes barysynda Prezıdent osy tarıhı kezdesýdi mazmundy ári joǵary deńgeıde uıymdastyrý jáne ótkizý úshin úlken jumystar kútip turǵanyna toqtalyp ótti. «Joǵary deńgeıde Sammıtti ótkizý, elimizdi kórsetý jáne jas astanada osyndaı forýmdy ótkizý múmkindigi - biz úshin úlken qurmet jáne zor jaýapkershilik», dedi N.Nazarbaev.