«Salamatty Qazaqstan» poıyzy Otyrardaǵy «Aqshoqat» stantsııasyna aıaldady

«Salamatty Qazaqstan» medıtsınalyq poıyzy Otyrar aýdanyndaǵy «Aqshoqat» stantsııasyna aıaldady, dep habarlaıdy Kazinform.

Túrkistan oblysyndaǵy sapary Saýran aýdanynan bastalǵan medıtsınalyq poıyz Otyrar aýdanyndaǵy «Aqshoqat» stantsııasyna kelip toqtady. Tájirıbeli mamandar tańnan bastap aýyl turǵyndaryna tegin medıtsınalyq, psıhologııalyq, quqyqtyq jáne medıatıvtik kómek kórsetýde. Elimizdiń barlyq oblysyn aralap kele jatqan poıyz qyzmeti Otyrar aýdanynda eki kúnge jalǵasady.

Mamandardy stantsııa aldynan kútip alǵan aýdan ákiminiń orynbasary Aıdos Qulmahanov halyqtyń densaýlyǵy men quqyqtyq kómek alýyna arnalǵan jobanyń mańyzdylyǵyn atap ótti.

«Bul jobada kez kelgen azamat barlyq máselege qatysty quqyqtyq, psıhologııalyq jáne medıatıvtik eń úzdik kásibı zańgerlerden, psıhologterden, medıatorlardan tegin jáne tolyq kólemde qajetti kómek pen keńes ala alady. Sondyqtan shalǵaı aýyldarda turyp qajetti medıtsınalyq jáne quqyqtyq kómekterdi alýǵa múmkindigi bolmaǵan turǵyndar úshin bul úlken múmkindik. Aýyl turǵyndaryn búgingi sharaǵa barynsha atsalysyp, qajetti qoldaýlardy tıimdi paıdalanýǵa shaqyramyn», – dedi aýdan ákiminiń orynbasary.

QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń ókili Talǵat Ámirjanov pen aǵa medbıke Altynaı Kúderbekova medıtsınalyq kómek kórsetýge baǵyttalǵan jobaǵa bıyl alǵash ret kásibı jáne tájirıbeli medıatorlar men zańgerler tartylyp, turǵyndardyń ártúrli toptaryna tegin medıatsııa jáne zańgerlik kómek kórsetilip jatqanyn jetkizdi.

Aıta keteıik, budan aldyn «Salamatty Qazaqstan» medıtsınalyq poıyzy Túrkistan oblysyna qarasha aıynyń 4-nen bastap 17-ine deıin toqtaıtynyn jazǵan bolatynbyz.