«Salamatty Qazaqstan» medıtsınalyq poıyzy SQO turǵyndaryn qabyldaýdy bastady

PETROPAVL. KAZINFORM – «Salamatty Qazaqstan» medıtsınalyq poıyzy Soltústik Qazaqstan oblysyna jetti. Aıdyń sońyna deıin jol boıyndaǵy ár stantsııaǵa toqtap, bilikti mamandar óńir jurtshylyǵyn qabyldap, tegin tekseristen ótkizbek.

SQO-da medıtsınalyq poıyz aıaldaǵan alǵashqy jer - Tımırıazev aýdanyndaǵy Aqsýat stansasy. Búgin dárigerler Jambyl aýdanyndaǵy Qaırankól stansasynda jumys istep jatyr. Qaıyrymdylyq jobasy aıasynda turǵyndar medıtsınalyq tekseristen ótip, tájirıbeli mamandardyń keńesin alady. 

«Salamatty Qazaqstan» medıtsınalyq poıyzy nemis jáne japondyq qondyrǵylarmen jabdyqtalǵan. Bul jalpy jáne bıohımııalyq taldaýlar, rentgenografııa jáne flıýorografııa, ishki organdar men tamyrlardy ýltradybystyq zertteý, elektrokardıogramma, gastrofıbroskopııa, dıagnostıkalyq zertteýlerdiń basqa da túrlerin júrgizýge múmkindik beredi. Zertteý tolyq tegin jasalyp, nátıjesi sol jerde birden belgili bolady. 

Turǵyndardy hırýrg-travmatolog, okýlıst, otolarıngolog, nevropatolog, stomatolog, kardıolog, gınekolog, pedıatr, psıholog, jalpy praktıka dárigeri qabyldaıdy. Qajet bolǵan jaǵdaıda quqyqtyq, medıatıvtik kómekti tegin kórsetetin kásibı medıator men zańger de bar. 

Dárigerler tańǵy saǵat 9.00-den, bir saǵat túski úziliske ketip, saǵat 18.00-ge deıin jumys istep jatyr. Turǵyndardy saqtandyrý mártebesine jáne turǵylyqty jerine qaramastan kezekpen qabyldaıdy. 

Uıymdastyrýshylardyń aıtýynsha, medıtsınalyq poıyz 28 shilde kúni Taıynsha stantsııasyna toqtaıdy, 29 shildede Taıynsha aýdanyndaǵy Chkalov stantsııasynda bolady. 30 shilde kúni Aqjar aýdanyndaǵy Dáýt stantsııasyna jetse, 31 shildede Qyzyl Tý stantsııasynda Ýálıhanov aýdanynyń turǵyndaryn kútedi. 

Buǵan deıin SQO-da jarty jylda óndiriste jazataıym oqıǵadan 17 adamnyń jaraqat alyp, ekeýiniń mert bolǵanyn jazǵan edik.