«Salamatty Qazaqstan» medıtsınalyq poıyzy Pavlodar oblysyna jetti
PAVLODAR. KAZINFORM — «Salamatty Qazaqstan» medıtsınalyq poıyzy Pavlodar oblysynyń shalǵaıdaǵy aýyldyq eldi mekenderiniń turǵyndaryna medıtsınalyq kómek kórsetedi. Ol alǵashqy aıaldamasyn Shiderti aýylynda jasady. Birinshi kúni medıtsına qyzmetkerleri brıgadasy 105 turǵyndy qabyldady. Bul týraly Densaýlyq saqtaý mınıstrligi málim etti.
Barlyq medıtsınalyq qyzmetter mindetti áleýmettik medıtsınalyq saqtandyrý júıesi jáne tegin medıtsınalyq kómektiń kepildik berilgen kólemi sheńberinde tegin kórsetiledi.
Brıgada quramynda terapııa, hırýrgııa, pedıatrııa, kardıologııa, nevrologııa, oftalmologııa, stomatologııa, gınekologııa, otorınolarıngologııa, psıhologııalyq kómek sııaqty on bes baǵyt boıynsha dárigerler jumys isteıdi.
— Patsıentterge zamanaýı dıagnostıkalyq zertteýler qoljetimdi: EKG, ýltradybystyq, mammografııa, zerthanalyq zertteýler. Qajet bolǵan jaǵdaıda dárigerler kishigirim hırýrgııalyq aralasýlar jasaıdy jáne odan ári emdeýge joldama beredi. Mobıldiligi tómen patsıentter úshin mobıldi brıgadanyń shyǵýy kózdelgen, — delingen habarlamada.
Shidertterden keıin poıyz marshrýtty jalǵastyryp, Maıqaıyń, Spýtnık, Sharbaqty, Kóktóbe, Jumysker eldi mekenderine barady, sodan keıin Qazaqstannyń basqa óńirlerine barady.
28 tamyz ben 4 qyrkúıek aralyǵynda oblystyń aýyl turǵyndary tegin zerttep-qaraýdan ótip, tájirıbeli mamandardan konsýltatsııa ala alady. Poıyz óńirdiń shalǵaıdaǵy stantsııalary arqyly júredi, bul aýyl turǵyndaryna qalaǵa barmaı-aq dıagnostıkadan ótý men emdelýge múmkindik beredi.
Eske sala keteıik, buǵan deıin Pavlodar oblysynda naýqas áıel men náresteni qutqarý úshin tikushaq qajet boldy.