«Salamatty Qazaqstan» medıtsınalyq poıyzy Qulsaryǵa jetti
ATYRAÝ. KAZINFORM – Búgin «Salamatty Qazaqstan» medıtsınalyq poıyzy Atyraý oblysyndaǵy Qulsary qalasynyń turǵyndaryna kómek kórsetýdi bastady.
Atyraý oblysy jedel shtabynyń málimetinshe, medıtsınalyq poıyz Qazaqstan Prezıdentiniń janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń qoldaýymen 1 mamyrda jolǵa shyqqan.
Búgin medıtsınalyq poıyz Qulsary qalasyna kelip, turǵyndarǵa tegin qyzmet kórsetýdi bastady. Munda 28 mamyrǵa deıin bolady.
«Elimizdiń úzdik dárigerleri, medıatorlary, psıhologtary jáne zańgerleri bar «Salamatty Qazaqstan» medıtsınalyq poıyzy áleýmettik jobasynyń maqsaty – shalǵaı stantsıalarda turatyn azamattarǵa tegin medıtsınalyq, psıhologııalyq, quqyqtyq jáne medıatıvtik (tatýlasý) kómek kórsetý. Jaǵdaıy qıyn jáne muqtaj toptaǵy turǵyndarǵa tıimdi medıtsınalyq, psıhologııalyq, quqyqtyq jáne medıatıvtik (tatýlastyq) kómek kórsetiledi», - dep habarlady oblystyq jedel shtab.
Medıtsınalyq poıyz quramyna 40 maman engen. Olar – medıtsına qyzmetkerleri, medıatorlar men zańgerler. Dárigerlik quramda terapevt, hırýrg, pedıatr, psıholog, nevropatolog, ýltradybystyq dıagnostıka mamany, jalpy tájirıbelik dáriger, rentgenolog, kardıolog, stomatolog, oftalmolog, otolarıngolog, pedıatr, onkolog-mammolog, gınekolog jáne ýrolog mamandary bar. Qajet bolǵan jaǵdaıda mamandar túrli operatsııa jasap, josparly emdeýge joldama beredi.
Eske sala ketelik, budan buryn Serik Shápkenov Qulsary turǵyndary tutynatyn aýyz sý sapasyn jaqsartýdy tapsyrǵan edi.
