«Salamatty Qazaqstan» medıtsınalyq poıyzy Aqtóbe oblysyna saparyn aıaqtaıdy
«Salamatty Qazaqstan» medıtsınalyq poıyzy Aqtóbe oblysynyń turǵyndaryn qabyldaýdy aıaqtaýǵa jaqyn. Kazinform bul týraly «Qazaqstan temir joly» kompanııasynyń málimetine silteme jasap habarlaıdy.
Dońǵalaqty emhana qazir oblystyń altynshy stantsııasy – Qarashokat turǵyndaryn qabyldap jatyr. Buǵan deıin 10 kún ishinde poıyz Kempirsaı, Jem, Muǵaljar, Bershúgir jáne Qotyrtas stantsııalarynda bolǵan edi.
Joba aıasynda shalǵaıdaǵy stantsııalarda turatyn halyq negizgi medıtsınalyq mamandyqtardyń bilikti mamandarynan (terapevt, stomatolog, oftalmolog, lor-dáriger, hırýrg, ýrolog, mammolog, pedıatr jáne basqalar) tegin tekserýden jáne emdelýden ótip jatyr.
Bul oblysta dárigerler kóbine relstegi emhanaǵa kúndiz kele almaǵan naýqastardy úıine baryp qarady. Mysaly, Bershúgir stantsııasynda dárigerler ınsýlttan keıin naýqasty úıde muqııat tekserip, óz usynystary men qorytyndylaryn berdi.
Budan basqa, jergilikti turǵyndarǵa azamattardyń memlekettik áleýmettik qoldaý alý, zeınetaqy, járdemaqy, áleýmettik tólemder jáne ataýly áleýmettik kómek alý quqyqtaryn qorǵaý máseleleri boıynsha tegin konsýltatsııalar berildi.
Esterińizge sala keteıik, «Salamatty Qazaqstan» medpoıyzy – áleýmettik jobany «Samruk-Kazyna Trust» áleýmettik jobalardy damytý qory «Samruk-Kazyna» AQ kompanııalar tobynyń atynan, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa men Densaýlyq saqtaý mınıstrliginiń qatysýymen, «Áleýmettik jobalar qory» Korporatıvtik qorymen birlesip júzege asyrýda. «Salamatty Qazaqstan» áleýmettik jobasynyń basty aqparattyq seriktesi – QR Prezıdentiniń Teleradıokesheni.
2023 jyldyń 18 qazanynda «Salamatty Qazaqstan» medpoıyzy Qyzylorda oblysyna kelip, aǵymdaǵy jyldyń 3 qarashasyna deıin 9 stantsııa turǵyndaryn qabyldaıdy.
Máselen, oblystyń birinshi stantsııasy – Sekseýil (18-21 qazan), budan ári – Sapaq (21-22 qazan), Shómish (22-23 qazan), Belkól (24-26 qazan), Tartoǵaı (26-27 qazan), Baıǵaqum (27-29 qazan), Aqmaıa rzd. (29-31 qazan), Ekpindi rzd. (31 qazan – 2 qarasha) jáne Aqqum (2-3 qarasha).
