«Salamatty Qazaqstan» medıtsınalyq poıyzy 123 aýylǵa barady
ASTANA. KAZINFORM – Shalǵaı aýyldarda turatyn 90 myńnan astam qazaqstandyq dárigerlerden bilikti kómek, sondaı-aq zańgerler men medıatorlardan keńes alady. «Salamatty Qazaqstan» medıtsınalyq poıyzy elimizdiń óńirleri boıynsha kezekti saparyna shyqty.
Poıyz elordalyq «Nurly jol» stantsııasynan eldiń batysyna qaraı baǵyt aldy. Saltanatty shyǵaryp salý rásimine «Samuryq-Qazyna» AQ basqarýshy dırektory Ǵıbrat Aýǵanov, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen, QR Densaýlyq saqtaý vıtse-mınıstri Tımýr Muratov pen qoǵam ókilderi qatysty.
- Samuryq-Qazyna» qory elimizdiń medıtsına salasyna júıeli túrde qoldaý kórsetip keledi. Bul – azamattarymyzdyń ómir sapasyn jaqsartýǵa arnalǵan shynaıy qamqorlyqtyń kórinisi. «Salamatty Qazaqstan» medıtsınalyq poıyzy – qorymyzdyń aýyl turǵyndaryna medıtsınalyq ári quqyqtyq kómek kórsetýge baǵyttalǵan erekshe bastamasy. 2010 jyldan beri poıyz 2 myńnan astam aýylda bolyp, 800 myńǵa jýyq azamatqa qoldaý kórsetti. Turǵyndarǵa keńes berilip qana qoımaı, shaǵyn operatsııalar júrgizildi, kóptegen áleýmettik másele sheshimin tapty. Osylaısha medpoıyz halyqtyń júreginen oryn alǵan, shyn máninde ulttyq deńgeıdegi jobaǵa aınaldy, - dep atap ótti «Samuryq-Qazyna» AQ basqarýshy dırektory Ǵıbrat Aýǵanov.
Alty aı ishinde «temirjol ústindegi emhana» 21 000 shaqyrymnan astam jol júredi. Marshrýt Mańǵystaý oblysy Beıneý aýdanynyń Turysh aýylynan bastalady, bul – josparlanǵan 123 aıaldamanyń alǵashqysy.
Árbir eldi mekende poıyz bir-eki kúnge aıaldaıdy. Osy ýaqytta dárigerler, medıatorlar men zańgerler tek jergilikti turǵyndardy ǵana emes, poıyz barmaıtyn kórshi aýyldardyń turǵyndaryn da tolyqtaı qabyldap, keńes bere alady.
Qabyldaýdy túrli baǵyttaǵy 30 maman júrgizedi: terapevt, hırýrg-travmatolog, kardıolog, ÝDZ dárigeri, otorınolarıngolog, nevropatolog, pedıatr, akýsher-gınekolog, oftalmolog, ýrolog, stomatolog-terapevt, rentgenolog, fýnktsıonaldy dıagnostıka dárigeri jáne psıholog. Dárigerler tek keńes berip, em taǵaıyndap qana qoımaı, qajet bolǵan jaǵdaıda jeńil operatsııalar da jasaıdy. Bul úshin poıyzda barlyq sanıtarlyq jaǵdaı, zamanaýı jabdyqtar men dıagnostıkalyq apparattar qarastyrylǵan. Kómekke kez kelgen azamat júgine alady, mindetti áleýmettik medıtsınalyq saqtandyrýdyń bolýy shart emes.
Medıtsınalyq vagondarda sondaı-aq qannyń jalpy jáne bıohımııalyq taldaýy, flıýorografııa, ýltradybystyq zertteý, gastroenteroskopııa, elektrokardıogramma jáne basqa da dıagnostıkalyq protsedýralar qoljetimdi.
Poıyzda zańgerler men medıatorlar da qyzmet kórsetedi. Olar azamattarǵa áleýmettik jáne quqyqtyq máseleler boıynsha keńes beredi. Aýyl turǵyndary eńbek daýlaryn sheshý, memlekettik áleýmettik tólemderge ótinish berý, sot isterin júrgizý boıynsha keńes alý úshin mamandarǵa júgine alady.
Medıtsınalyq poıyz jobasy 2010 jyldan beri júzege asyrylyp keledi. Osy ýaqyt ishinde 800 myńnan astam qazaqstandyq dárigerlerden kómek aldy, al joǵary tehnologııalyq jabdyqtardyń kómegimen hırýrgtar shamamen 37 myń operatsııa jasady. Em alǵan ár besinshi patsıent – bala.
Aıta keteıik, ótken jyly «Salamatty Qazaqstan» poıyzynyń dárigerleri 104 250 qazaqstandyqqa tegin medıtsınalyq jáne quqyqtyq kómek kórsetti. Medıtsınalyq poıyz aýyl turǵyndarynyń ómirindegi halyqtyq ári asyǵa kútetin oqıǵaǵa aınaldy.
– Biz birneshe jyldan beri otbasymyzben medıtsınalyq poıyzdyń dárigerlerine júginemiz. Ata-anam men balalarymnyń barlyq mamannan mindetti túrde tekserýden ótýin qadaǵalaımyn. Bizdiń aýyldan eń jaqyn emhana 130 shaqyrym jerde ornalasqan, sondyqtan poıyzdyń kelýi – sapaly medıtsınalyq kómek alýdyń tamasha múmkindigi, – dedi Aqtóbe oblysy Qarashoqat aýylyndaǵy balabaqsha tárbıeshisi Manash Kenjebaeva.
Poıyzdyń baǵyty men jumysyn uıymdastyrýdy «Samuryq-Qazyna» AQ kompanııalar toby atynan «Samruk-Kazyna Trust» qory qamtamasyz etedi. Jabdyqtaý, dári-dármek pen medıtsınalyq súıemeldeýdi Densaýlyq saqtaý mınıstrligi júrgizedi. Zańgerlik qoldaý men medıatorlardyń kómegin QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa usynady.
Medıtsınalyq poıyzdyń ózekti qozǵalys kestesi www.medpoezd.kz saıtynda jarııalanǵan.
Aıta keteıik, «Salamatty Qazaqstan» poıyzy dárigerleri 8 myńǵa jýyq ota jasady.