Salamat Muqashevtyń dombyrasy Atyraý mýzeıine berildi
ATYRAÝ. QazAqparat - Atyraýda aty ańyzǵa aınalǵan qoǵam jáne memleket qaıratkeri Salamat Muqashevtyń týǵanyna 90 jyl tolýyna oraı eske alý keshi ótkizildi. Oǵan Salamat Muqashevtyń jaqyndary, týǵany-týystary men qatarlas dostary qatysty, dep habarlaıdy «QazAqparat» HAA tilshisi Atyraý oblysy ákimdiginiń baspasóz qyzmetine silteme jasap.
Kesh qonaqtary aldynda aımaq basshysy Nurlan Noǵaev sóz alyp, Salamat Muqashevtyń Atyraý oblysynyń, jalpy Qazaqstannyń damýyna qosqan úlesin atap ótti.
Ol sondaı-aq, qoǵamnyń aǵa býyn ókilderi bastap ketken ıgi isterin jalǵastyrýǵa tyrysýy kerektigin aıtyp ótti. Qoǵam jáne memleket qaıratkeri Ravıl Cherdobaev, Madına Ǵabdýsálimova, jubaıy Márııa Sálimgereıqyzy Salamat Muqashev jaıly estelikterimen bólisti.
Salamat Muqashev 1927 jyly Atyraý qalasynda dúnıege kelgen. Qazaq KSR Joǵarǵy keńesi prezıdıýmynyń tóraǵasy, KSRO Joǵarǵy keńesi Keńes odaǵynyń 8-11 shaqyrylymynyń depýtaty bolǵan. 2014 jyly Qazaqstan Respýblıkasy Úkimetiniń qaýlysymen memleket jáne qoǵam qaıratkeri Salamat Muqashevtyń esimi Atyraý polıtehnıkalyq kolledjine berildi.
