Salah Reseıge qarsy negizgi quramda alańǵa shyǵady
ASTANA. QazAqparat - Fýtboldan 2018 jylǵy Álem chempıonatynyń «A» tobyndaǵy kezekti oıyny «Sankt-Peterbýrg» stadıonynda ótedi. Munda alań ıeleri - Reseı men Egıpet quramalary kúsh synasady, dep habarlaıdy QazAqparat tilshisi.
Álem chempıonaty bastalmaı turyp, jurtshylyqtyń nazary Mysyr quramasyna aýdy. Sebebi, komandanyń basty juldyzy Mohamed Salah Chempıondar lıgasy fınalynda jaraqat alyp, egıpettik jankúıerlerdiń kóńilin kúpti etken-di. Degenmen, dárigerler «Lıverpýl» shabýylshysynyń Reseıge qarsy alańǵa shyǵatynyn aıtty. Buǵan qosa Salahtyń ózi Instagram paraqshasynda búgingi kezdesýge daıyn ekenin jetkizdi.
Sonymen, Egıpet quramasynyń qaıta jandanǵan shaǵy 2015 jylmen sáıkes keledi. Komanda tizginin bilikti bapker Ektor Kýper ustady. Olar birneshe joldastyq kezdesýlerde jeńiske jetip, FIFA reıtıngindegi jaǵdaıyn jaqsartty. Al 2017 jyly Egıpet Afrıka ulttar kýbogynyń chempıony atandy. Qazirgi quramy birneshe áleýetti oıynshylardan jasaqtalǵan. Álgi Salahty aıtpaǵannyń ózinde, aǵylshyn lıgasynda dop tebetin qorǵaýshy Ahmed Hegazı bar. Londonnyń «Arsenalynda» negizgi quramda oınaıtyn Mohamed El-Nenı týraly áńgime alabóten. Ol Álem chemıponaty aldynda óz komandasymen kelisim-shartyn uzartty. Shabýyl ótinde Mohamed Salahqa járdemdesetin Marvan Mohsen de naǵyz babynda.
Egıpet ulttyq qurama komandasy Álem chempıonatyna osymen úshinshi márte qatysady. Osyǵan deıingi dodalarda olar toptyq kezeńderden ári asa almaı qalǵan-tyn. Olaı bolsa, Reseıge qarsy ótetin match argentınalyq Ektor Kýper men onyń jigitterine naǵyz syn bolǵaly tur.
Reseı úshin bul kezdesýdiń mańyzy zor. Óıtkeni, Stanıslav Cherchesov shákirtteri mysyrlyqtardy utsa, toptan shyǵý máselesi ońaı sheshilmek. Eske salsaq, birinshi oıynda olar Saýd Arabııasynan 5:0 esebimen basym tústi.
Sol matchta jaraqat alǵan reseılik Alan Dzagoev búgin «Sankt-Peterbýrg» stadıonynda otandastaryna kómektese almaıdy. Aldyn ala boljamǵa súıensek, Dzagoev áli bir aptadaı alańǵa shyqpaıdy. Sarapshylar onyń ornyn «Spartak» jartylaı qorǵaýshysy Roman Zobnın basady dep otyr. Sondaı-aq, Cherchesov bapker shabýyl shebine Artem Dzıýbany qoıýy da yqtımal.
Reseı-Egıpet oıyny búgin Astana ýaqyty boıynsha 00:00-de bastalady.
«A» tobyndaǵy Ýrýgvaı men Saýd Arabııasyndaǵy match 20 maýsymda ótedi. Qalǵan oıyndardyń kestesin myna siltemeden kórýge bolady.
