Salaǵa shetel ınvestorlaryn tartý jumysyn tezdetý qajet — Toqaev

ASTANA. KAZINFORM — Aýyl sharýashylyǵyn joǵary tehnologııaǵa negizdelgen ozyq sala retinde damytý — mańyzdy mindet. Bul týraly Memleket basshysy Qasym-Jomart Toqaev Aýyl sharýashylyǵy eńbekkerleriniń ekinshi forýmynda aıtty. Bul týraly Aqordanyń baspasóz qyzmeti habarlady.   

 — Tereń óńdelgen ónim shyǵarýǵa basymdyq berý qajet. Elimizdegi agroónerkásip kesheni kóbine shıkizat shyǵarýmen shektelip otyr. Muny ashyq aıtqan jón. Aýyl sharýashylyǵyn joǵary tehnologııaǵa negizdelgen ozyq sala retinde damytý — mańyzdy mindet. 2023 jyly agroónerkásiptegi óńdelgen ónimniń úlesi nebári 35 paıyz edi. Al bıyl 50 paıyz boldy. Kelesi jyly 70 paıyzǵa tolyq jetýi kerek. Qazir bul salaǵa shetel ınvestorlaryn tartý jumysyn tezdetý qajet, — dedi Prezıdent.

Memleket basshysy tıisti jobalar az emes ekenin, olardyń birnesheýimen jıyn aldynda tanysqanyn, biraq bir jerde toqtap qalýǵa bolmaıtynyn aıtty.

— Agroónerkásip kesheniniń basty baǵyttary boıynsha ınvestıtsııalyq jobalardy júzege asyrý qajet. Asa mańyzdy mindettiń biri — jeke ınvestıtsııa tartý jumysy. Ásirese, ozyq tehnologııasy bar shetel ınvestorlaryn elge ákelip, olarǵa qolaıly jaǵdaı jasaý qajet. Joldaýda «Investıtsııaǵa tapsyrys» óndiristiń suranysyna saı bolýy kerek dep aıttym. Úkimet agroónerkásip keshenine qatysty 200-den astam ınvestıtsııalyq jobanyń tizimin jasady. Jalpy quny shamamen 4 trıllıon teńge (úsh jylda) bolatyn bul jobalar 12 baǵyt boıynsha jasalǵan. Endi osy jobalarǵa barlyq deńgeıde qoldaý kórsetilýi kerek, ıaǵnı ortalyq ta, aımaqtar da osy jumysqa belsendi túrde qatysýy kerek. Jobalardyń qashan jáne qalaı júzege asyrylatynyn muqııat oılastyrǵan jón. Ákimdikter jáne mınıstrlikter jedel ári úılesimdi jumys isteýi qajet, — dedi Prezıdent.

Aıta keteıik, Prezıdent aýyl sharýashylyǵyna arnalǵan jeńildetilgen nesıe alǵash ret 1 trıllıon teńgeden asqanyn aıtty.