Salafızmniń bizge jat aǵym ekenin «taıǵa tańba basqandaı» uǵyndyryp berýge tıispiz - Májilis depýtaty
ASTANA. 17 maýsym. QazAqparat - Jastar arasynda salafızmniń bizge jat aǵym ekenin «taıǵa tańba basqandaı» etip uǵyndyryp berýge tıispiz.
Búgin Májiliste QR Din isteri agenttiginiń qyzmetine arnalǵan Úkimet saǵatynda Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev osylaı málim etti.
«Elbasy N. Nazarbaev: «Bizdiń túbimiz - túrik, dinimiz ıslam, sondyqtan qasıetti kitabymyz - Quran» dep aıtqan edi. Ata-babalarymyz Hanafı mázhabyn ustanǵan. Endeshe bunyń basqa mázhabtardan erekshelikterin kóbirek aıtyp, halyqqa túsindirýdi keńinen júrgizgen abzal. Salafızmniń bizge jat aǵym ekenin «taıǵa tańba basqandaı» uǵyndyryp berýge tıispiz. Sondaı-aq, kez-kelgen dástúrli dinniń beıbit maqsatqa, rýhanı damýǵa baǵyttalǵanyn uǵyndyrý qajet. Biz óz pozıtsııamyzdy jurtshylyqqa naqty túsindirýge tıispiz», - dedi komıtet tóraǵasy.
Sonymen qatar, Máýlen Áshimbaev qazirgi ýaqytta memlekettik arnalarda eki baǵdarlama ǵana shyǵatynyn, «qazaq radıosynda» bir aıdar shyǵarylatynyn jetkizdi. «Sondyqtan da, bul baǵyttaǵy jumysqa memlekettik emes telearnalardy da tartqan lázim. Aqparattyq jumysqa qoǵamdyq uıymdardy, zııalylar men depýtattardy keńinen tartqan oryndy», - deıdi M. Áshimbaev.
